საქართველოს მთავრობის ინფორმაციით, აშშ-ის პრეზიდენტი ბარაკ ობამა საქართველოს დამოუკიდებლობის დღეს ულოცავს. ირაკლი ღარიბაშვილისადმი გაგზავნილი მისალოცი წერილის თარგმანს საქართველოს პრემიერის პრესსამსახური აქვეყნებს. წერილი 2014 წლის 21 მაისით არის დათარიღებული.
"ძვირფასო, ბატონო, პრემიერმინისტრო! საუკეთესო სურვილებით გილოცავთ თქვენ და ქართველ ხალხს 26 მაისს, საქათველოს დამოუკიდებლობის დღეს. ბოლო წლის განმავლობაში ამერიკის შეერთებული შტატები სიამაყით უდგას მხარში საქართველოს, სადაც ჩატარდა თავისუფალი და სამართლიანი საპრეზიდენტო არჩევნები და ახალი პრეზიდენტის ინაუგურაცია, ქვეყნის ისტორიაში პირველად დასრულდა ძალაუფლების საკონსტიტუციო გზით გადაცემის პროცესი და დაინიშნა ახალი პრემიერმინისტრი. საქართველოს მხრიდან დემოკრატიული ღირებულებების ერთგულება ქმნის საფუძველს ჩვენს ქვეყნებს შორის მტკიცე და მზარდი პარტნიორობისათვის. იმედის თვალით შევყურებ თანამშრომლობას თქვენთან და პრეზიდენტ მარგველაშვილთან საქართველოში დემოკრატიული ინსტიტუტების შემდგომი კონსოლიდაციის, კანონის უზენაესობის განმტკიცებისა და პოლიტიკური პლურალიზმის უზრუნველყოფის პროცესში. მომავალი ადგილობრივი არჩევნები და ევროკავშირთან ასოცირების ხელშეკრულების მოსალოდნელი ხელმოწერა უზრუნველყოფს დამატებით შესაძლებლობებს საქართველოს მართლაც შთამბეჭდავი წინსვლის ნათელსაყოფად.
ჩემთვის სასიხარულო იყო თქვენთან შეხვედრა ვაშინგტონში თქვენი თებერვლის ვიზიტის დროს. როგორც უკვე ითქვა შეხვედრის დროს, ჩვენ კვლავაც დავუჭერთ მხარს საქართველოს დემოკრატიულ და ეკონომიკურ განვითარებას, რასაც სასიცოცხლო მნიშვნელობა ენიჭება ქვეყნის ევროატლანტიკური ინტეგრაციისათვის. მომდევნო წლებში რეფორმებისადმი ასეთი ერთგულება უზრუნველყოფს თავდაცვისა და უსაფრთხოების, ვაჭრობისა და ინვესტირების და ადამიანებს შორის კონტაქტების სფეროებში ჩვენი მტკიცე თანამშრომლობის კიდევ უფრო გაღრმავების შესაძლებლობას. ვდგავართ რა რეგიონში გამოწვევებით აღსავსე მოვლენების წინაშე, ამერიკის შეერთებული შტატები კვლავაც გაუწევს მძლავრ მხარდაჭერას საქართველოს ევროატლანტიკურ მიმართულებას და მის ტერიტორიულ მთლიანობასა და სუვერენიტეტს საერთაშორისოდ აღიარებული საზღვრების ფარგლებში.
გულწრფელად გილოცავთ თქვენი ქვეყნის დამოუკიდებლობის დღეს! ბარაკ ობამა" - ნათქვამია ამერიკის პრეზიდენტის წერილში, რომელიც პრემიერის პრესსამსახურმა გაავრცელა.
