ტაბულასთან საუბრისას პარლამენტის ევროპასთან ინტეგრაციის კომიტეტის თავმჯდომარემ, ვიქტორ დოლიძემ, საერთაშორისო ორგანიზაცია Freedom House-ის პრეზიდენტ დევიდ კრამერის განცხადებაზე გააკეთა კომენტარი. კრამერმა ექსპრეზიდენტ მიხეილ სააკაშვილისთვის ბრალის წარდგენასთან დაკავშირებით თქვა, რომ - "იქმნება შთაბეჭდილება, რომ სწორედ ასე იქცეოდა იანუკოვიჩი იულია ტიმოშენკოს წინააღმდეგ".
დოლიძე ამგვარ პარალელს არ ეთანხმება, თუმცა მიიჩნევს, რომ ხელისუფლებამ მაქსიმალურად გამართულად უნდა დაუმტკიცოს საერთაშორისო თანამეგობრობას, რომ პოლიტიკურ დევნას ადგილი არ აქვს.
"მე ამ პარალელს ნამდვილად არ გავავლებდი, იმიტომ, რომ ეს აბსოლუტურად სხვა საფუძველია. ვფიქრობ, კარგად გახსოვთ, რა სირთულეები იყო ტიმოშენკო-იანუკოვიჩს შორის ურთიერთობაში და საერთოდ ტიმოშენკოსთან დაკავშირებული საკითხებთან. ეს, რა თქმა უნდა, სააკაშვილს არანაირად არ უკავშირდება.
თუმცა, პირდაპირ გეტყვით, ეს Freedom House-ის პრეზიდენტი იქნება, ნებისმიერი ჩვენი მეგობარი სენატორი ვთქვათ, ხო? უმაღლესი თანამდებობის პირები, რომლებიც აკეთებენ განცხადებებს, ჩვენ მათი მადლიერი ვართ პირველ რიგში იმ მხარდაჭერისთვის, რაც ისეთ საკითხებს შეეხება, როგორიცაა ტერიტორიული მთლიანობის აღდგენა, დეოკუპაციის აუცილებლობის მნიშვნელობა და ა.შ., ისინი გვერდში გვიდგანან, ჩვენი მეგობრები არიან.
ამიტომ კრიტიკა ყოველთვის ნორმალური და ასატანია და ამაში ახალი და რევოლუციური არაფერია. სწორედ ამიტომ, საქართველოს ხელისუფლებამ და შესაბამისმა უწყებებმა უნდა დაადასტურონ მაქსიმალურად სამართლებრივად, გამართულად უნდა დაუმტკიცონ საერთაშორისო თანამეგობრობას ის, რომ არანაირი პოლიტიკური საფუძველი არ აქვს იმას, რომ რაღაც დევნა ხორციელდება.
და თუკი რამე დარღვევა იყო და კრიმინალთან გვქვს საქმე და ა.შ., ეს იქნება ადმინისტრაციული თუ სისხლის სამართლებრივი სახის, ბუნებრივია, რომ პრეზიდენტი იქნება თუ ჩვეულებრივი ობივატელი, კითხვებზე პასუხი უნდა გაეცეს. მე იმედი მაქვს, კიდევ ერთხელ ვადასტურებ, რომ ჩვენი შესაბამისი უწყებები ამას მაღალკვალიფიციურ დონეზე შეძლებენ რომ გააკეთონ, დანარჩენს მომავალი გვიჩვენებს", - განაცხადა დოლიძემ.
ტაბულამ დოლიძეს ჰკითხა, რით ახსნიდა იმას, რომ საქართველოს სტრატეგიული პარტნიორებისა და პოლიტიკური ლიდერების კრიტიკაზე საქართველოს ხელისუფლების პასუხი, რომ კანონზე მაღლა არავინ დგას, ერთი-ერთში ემთხვევა ვიქტორ იანუკოვიჩის პასუხს. როდესაც მას პოლიტიკური ოპონენტების დევნისთვის აკრიტიკებდნენ, ისიც ამტკიცებდა, რომ კანონზე მაღლა არავინ დგას.
"იგივე უნდა გიპასუხოთ. რა თქმა უნდა, ერთი მხრივ, კანონზე მაღლა არავინ დგას და, მეორე მხრივ, ის რომ კანონზე მაღლა არავინ დგას, ეს დარჩეს მხოლოდ და მხოლოდ განცხადების დონეზე და რეალურად დასაბუთებული არ იქნას ეს დანაშაულებები, თუკი ამდაგვარს ჰქონია ადგილი, ესეც უკვე კანონზე მაღლა დადგომაა. შენ თუ კანონს არ ემორჩილები და კანონის შესაბამისად არ მოქმედებ, აქედან გამომდინარე, იგივე უნდა გიპასუხოთ.
9 წელი, 9 წელი, იმდენად ამოჩემებული გვაქვს უკვე, ამაზე საუბარიც მართალი გითხრათ არ მიყვარს. მაგრამ ეს ხომ რეალობაა, ის რაც გამოვიარეთ, თქვენ, მე, სხვა ჩვენმა თანამოქალაქეებმა და ნახეს, როგორი ძალადობრივი რეჟიმი იყო ამ ქვეყანაში. ეს ხომ ზოგადი სახეა ამ ყველაფრის და ვიცით, რომ ესე იყო.
მაგრამ თუკი ვაშენებთ სამართლიან ქვეყანას, თუკი ჩვენ ვაშენებთ კანონის უზენაესობაზე დაფუძნებულ ქვეყანას, რა თქმა უნდა, უნდა იყოს ყველა ფაქტობრივი მასალა უკლებლივ წარმოდგენილი და გამყარებული მაქსიმალურად, როდესაც საქმეები აღიძვრება, ანდა რაიმე კითხვები არსებობს. ამიტომ კიდევ ერთხელ გიმეორებთ, კანონზე მაღლა არავინ დგას, სწორია და, ჩემი აზრით, ეს უნდა იყოს უპირველესი სტანდარტი, მაგრამ, მეორე მხრივ, უნდა დავასაბუთოთ ბოლომდე, რომ რაღაცა კითხვები კიდევ ჩვენს მეგობრებს არ გავუჩინოთ", - განაცხადა დოლიძემ.
