საქართველოს იუსტიციის მინისტრი არ გამორიცხავს, რომ ნაციონალური მოძრაობა წინასწარდაგეგმილი დანაშაულებით ცდილობდეს, აჩვენოს საზოგადოებას, თითქოსდა დანაშაულმა იმატა. წულუკიანმა პრემიერ ირაკლი ღარიბაშვილის ის განცხადება შეაფასა, რომელშიც მან იოსებ გიორხელიძის გატაცების ფაქტი ნაციონალურ მოძრაობას დაუკავშირა.
"აუცილებელია, დადგინდეს, იყო თუ არა კავშირი კუდ-ის ყოფილ თანამშრომლებსა და მაშინდელი, ყოფილი მთავრობის მმართველებს შორის. ამას, ალბათ, გამოძიების პროცესში უფრო მეტი ნათელი მოეფინება. თუმცა, მეც არ გამოვრიცხავ იმასაც, რომ ამგვარი წინასწარდაგეგმილი დანაშაულებით ცდილობდეს სწორედ ნაციონალური მოძრაობა, აჩვენოს საზოგადოებას, თითქოსდა დანაშაულმა იმატა. რა თქმა უნდა, ასეთი დანაშაულები თუ თავადვე მოიფიქრეს და დადგეს, შემდეგ სპეკულაციებიც შეუძლიათ წარმატებით", - თქვა წულუკიანმა.
"უმკაცრესად დაისჯება ყველა, ვინც ჩვენი სახელმწიფოს და მოქალაქეების წინააღმდეგ რამეს დაგეგმავს", - საქართველოს პრემიერმინისტრმა ირაკლი ღარიბაშვილმა ადამიანის მძევლად ხელში ჩაგდების ბრალდებით სოდ-ის და კუდ-ის ყოფილი თანამშრომლების დაკავება შეაფასა. როგორც პრემიერმა აღნიშნა, ეს ადამიანები სოდ-იდან და კუდ-იდან ორი წლის წინ, შინაგან საქმეთა მინისტრობისას გაათავისუფლა.
"ოპერაციას პირადად შინაგან საქმეთა მინისტრი ხელმძღვანელობდა. დღეს დილით, 07:00 საათზე მინისტრმა დამირეკა და მითხრა, რომ დაკავებულები იყვნენ გამტაცებლები. მინდა, კიდევ ერთხელ შევახსენო მოსახლეობას, ვის ხელში იყო საქართველო. ასეთი კრიმინალების, გამტაცებლების, მკვლელების და ყაჩაღების ხელში იყო მთელი შინაგან საქმეთა სამინისტრო და ესენი მართავდნენ საქართველოს. გასარკვევია, ვინ დგას ამის უკან და სამინისტრო და მინისტრი ამის გარკვევაზე მუშაობენ. ეს შემთხვევითი არ არის. მე მაქვს გონივრული ეჭვი, რომ ამის უკან დგას ორგანიზებული ძალა. დამრჩა შთაბეჭდილება, რომ ეს არის ნაციონალური მოძრაობის ხელწერა, თუმცა ამას, რა თქმა უნდა გამოძიება სჭირდება. ეს არის ის, რაზეც ალექსანდრე ჭიკაიძე საუბრობდა სულ რაღაც ერთი თვის წინ, რომ ეს არის ორგანიზებული ჯგუფი“, - განაცხადა პრემიერმინისტრმა და აღნიშნა, რომ ფოთსა და თბილისში, ლოტკინის დასახლებაში, იმართება ორგანიზებული აქციები, რომლის მონაწილეთა პრობლემების მოსაგვარებლად ნაციონალური მოძრაობის ხელისუფლებას 9 წელი ჰქონდა. ამასთან, ირაკლი ღარიბაშვილმა შინაგან საქმეთა სამინისტროს მადლობა გადაუხადა "მაღალპროფესიონალურ დონეზე შესრულებული ოპერაციისთვის, რომლის შედეგად, მძევლად აყვანილი იოსებ გიორხელიძე ოჯახს ყოველგვარი ზიანის გარეშე დაუბრუნდა".
საქართველოს პრემიერის განცხადებით, "მინდა, კიდევ ერთხელ გავაფრთხილო ის ადამიანები, ვინც დგას მათ უკან და ვის ბინძურ თავშიც იხარშება ეს სისასტიკე, რომელიც იგეგმებოდა წლების განმავლობაში, ესენი არიან ადამიანები, რომლებმაც ჩაიდინეს ხურჩის ტერაქტი, ისინი, ვინც აუპატიურებდნენ და აწამებდნენ ადამიანებს პოლიციაში, ციხეებში, იტაცებდნენ და კლავდნენ ადამიანებს. მინდა, მათ საბოლოო გაფრთხილება მივცე - გონს მოეგონ, თუ ისინი სახელმწიფოს და ჩვენი მოქალაქეების წინააღმდეგ რამეს დაგეგმავენ, უმკაცრესად დაისჯებიან. ძალიან მკაცრად დაისჯება ყველა, ვინც მსგავს პროვოკაციას და სიბინძურეს გააკეთებს".
