საქართველოს პრეზიდენტი გიორგი მარგველაშვილი დღეს ერთიანი ნაციონალური მოძრაობის ლიდერებს შეხვდა. პრეზიდენტის ადმინისტრაციის ინფორმაციით, საუბრის მთავარი თემები ოკუპირებულ ტერიტორიებზე - აფხაზეთსა და ცხინვალის რეგიონში შექმნილი ვითარება და რუსეთის მიერ საქართველოს ოკუპაციის საკითხები იყო.
"გიორგი მარგველაშვილმა პარტიის წარმომადგენლების პოზიცია მოისმინა აღნიშნულ თემაზე და მათ საკუთარი მოსაზრება გააცნო. ნაციონალური მოძრაობის ლიდერები მნიშვნელოვნად მიიჩნევენ პრეზიდენტის ინიციატივას ქვეყნის წინაშე მდგარ გამოწვევებთან დაკავშირებით დისკუსიის დაწყების თაობაზე. მათ მზადყოფნა გამოთქვეს, მონაწილეობა მიიღონ ერთიანი პოზიციის ჩამოყალიბებაში ანტიანექსიური პოლიტიკის შემუშავების თვალსაზრისით.
შეხვედრას ერთიანი ნაციონალური მოძრაობის მხრიდან ესწრებოდნენ დავით ბაქრაძე, გიგი წერეთელი, ზურა ჯაფარიძე, გიგა ბოკერია და აკაკი ბობოხიძე. დიალოგში მონაწილეობა მიიღეს ასევე უშიშროების საბჭოს ხელმძღვანელმა პირებმა ირინე იმერლიშვილმა და ივლიანე ხაინდრავამ, ადმინისტრაციის უფროსმა დავით პატარაიამ და პრეზიდენტის მრჩევლებმა გიორგი აბაშიშვილმა და თენგიზ ფხალაძემ",- იუწყება პრეზიდენტის ადმინისტრაცია.
