"საქმის მასალებში კიდევ ბევრი საინტერესო რაღაც დევს, რომელიც თავიდან ბოლომდე დაანგრევს იმ სისულელეებს, რაზეც ყოფილი ხელისუფლების წარმომადგენლები საუბრობენ", - ამის შესახებ საპარლამენტო უმრავლესობის წევრმა გოგლა ჟვანიამ განაცხადა. ის ზურაბ ჟვანიას და რაულ უსუპოვის გარდაცვალების საქმეზე მომზადებულ FBI-ის დასკვნას გამოეხმაურა, რომელიც გუშინ რუსთავი 2-მა გაასაჯაროვა.
"იმ სიბინძურეზე, რომელზეც მე გუშინ მომიწია საუბარი, იმ ინსცენირებაზე, რაც აქვთ შეთითხნილი, რატომ მოუნდათ საერთოდ საუბარი? ერთი წამით რომ დავუშვათ, რომ ეს სიბინძურე არის სიმართლე, რა კავშირი აქვს ამას საერთოდ ზურას და უსუპოვის სიკვდილის გარემოებებთან? სჯობს, გასცენ იმ შეკითხვებზე პასუხი, რომელიც არსებობს და ძალიან საფუძვლიანი ეჭვები არსებობს", - თქვა დეპუტატმა.
გოგლა ჟვანიას განცხადებით, ბინაში, სადაც ოფიციალური ვერსიის თანახმად ზურაბ ჟვანია და რაულ უსუპოვი გარდაიცვალნენ, "გაზის გამათბობელს საერთოდ არ უმუშავია, ეს გაზის გამათბობელი არ ჩართულა იმ ბინაში". დეპუტატის თქმით, "FBI-ის დასკვნაში, შავით თეთრზე უწერიათ ამერიკელებს, რომ სანამ დაიწყებდნენ ექსპერიმენტის ჩატარებას, მათ დაათვალიერეს გაზის გამათბობელი და დაწერეს, რომ საერთოდ არ აღენიშნება არანაირი მურის კვალი. ნებისმიერ ტექნიკურ ექსპერტს რომ შეეკითხოთ, შეუძლებელია გაზის გამათბობელი ჩართო და ამუშაო, მით უმეტეს ავარიულ რეჟიმში, არასრული წვის პირობებში, მით უმეტეს, როცა წნევა არის მკვეთრად მომატებული ისე, რომ ეს გამათბობელი არ ბოლავდეს, ასეთი რამ შეუძლებელია. ამერიკელებმა ამ დასკვნაში, რომელსაც გუშინ აფრიალებდნენ, ჩაწერეს, რომ არანაირი მურის კვალი არ დაფიქსირებულა. ანალოგიური დასკვნები აქვთ გაკეთებული ქართველ ექსპერტებსაც, რომლებმაც ექსპერიმენტამდე დაათვალიერეს გამათბობელი და ეს დევს საქმის მასალებში".
"რამდენიმე დღის წინ საზოგადოებისთვის ნათელი გახდა, როგორ ხდებოდა ნივთმტკიცებების გაყალბება და ბრალი აქვს წაყენებული ორ პიროვნებას, კონკრეტულ დანაშაულზე, კონკრეტული ნივთმკტიცებების გაყალბებაზე და ეს ნივთმტკიცებები არის ძალიან მნიშვნელოვანი, იმიტომ რომ ეს ე.წ გუშინ გაჟღერებული ვერსია ეფუძნება ზუსტად სხვადასხვა ნივთმტკიცებებს, ვთქვათ, იქ მიტანილი ძეხვეული, სასმელები და სხვა პროდუქტები ზუსტად არის ამ ვერსიის ერთ-ერთი მნიშვნელოვანი შემადგენელი ნაწილი. დღეს უკვე ნათელია, რომ ეს ნივთმტკიცებები იქ მიტანილია და მოხდა ამის გაყალბება და ინსცენირება", - აცხადებს დაღუპული პრემიერმინისტრის ძმა.
ცნობისთვის, ამერიკის გამოძიების ფედერალური ბიუროს დასკვნაში, რომელიც ზურაბ ჟვანიას და რაულ უსუპოვის საქმეზე მომზადდა, მითითებულია, რომ გარდაცვლილების დნმ-ის კვალი რამდენიმე განსხვავებული ტიპის ნივთზეა აღმოჩენილი, მათ შორის ხალათებსა და ზეწარზეც. ეს ინფორმაცია ტელეკომპანია რუსთავი 2-ის ეთერში, გადაცემა არჩევანში გასაჯაროვდა. ტელეკომპანიას კონფიდენციალურმა წყარომ FBI-ის დასკვნის დღემდე უცნობი ნაწილი მიაწოდა. დასკვნებში, რომლებიც 2005, 2006 და 2007 წლებით თარიღდება, დეტალურად არის აღწერილი შემთხვევის ადგილი, ყველა ნივთი და ყველა ნივთიერება, რომელიც გამომძიებლებმა ბინაში აღმოაჩინეს. დასკვნაში წერია, რომ ბინაში გაზის გამათბობელი არასწორად იყო დამონტაჟებული.
საქმის ახალ დეტალებზე ზურაბ ჟვანიას ძმამ გოგლა ჟვანიამ ისაუბრა. ის პარლამენტში დეპუტატია ქართული ოცნებიდან. მისი თქმით, ისედაც ცნობილი იყო ფაქტი, რომ შემთხვევის ადგილზე ზურაბ ჟვანიასა და რაულ უსუპოვს შორის სქესობრივი აქტის ნიშნები დახვდათ. გოგლა ჟვანია აღნიშნავს, რომ გუშინ გახმაურებულ ინფორმაციაში ახალი არაფერი ყოფილა. თუმცა, მისი მტკიცებით, ეს ინსცენირებული იყო, რადგან მაშინდელ ხელისუფლებას სურდა, საზოგადოებას ეს ვარიანტი დაეჯერებინა. გოგლა ჟვანია მიიჩნევს, რომ "გამოძიება ახლა სწორი გზით მიდის".
ექსპრემიერი ზურაბ ჟვანია და რაულ უსუპოვი 2005 წლის 3 თებერვალს საბურთალოზე ერთ-ერთ ბინაში გარდაცვლილები იპოვეს. გამოძიების თანახმად, ისინი გაზის გამათბობლიდან ნახშირჟანგის გაჟონვის შედეგად მოიწამლნენ. სწორედ აღნიშნულს ადასტურებდა აშშ-ის გამოძიების ფედერალური ბიუროს თბილისის წარმომადგელობის ხელმძღვანელი ბრაიან პარმანი მას შემდეგ, რაც ბიუროს წარმომადგენლები საქართველოში იმყოფებოდნენ და დასკვნა მოამზადეს.
ჯერ კიდევ პრეზიდენტი მიხეილ სააკაშვილი ბიუროს დასკვნის გამოუქვეყნებლობის მიზეზად ასახელებდა იმას, რომ საქმე "ადამიანის ბევრ ღრმა დეტალს" ეხებოდა. "ჩვენ ეს დასკვნა არ გამოვაქვეყნეთ გასაგები მიზეზების გამო, იმიტომ, რომ საქმე ეხება ადამიანის ბევრ ძალიან ღრმა და ისეთ დეტალს. და ნამდვილად ჩემთვის ზურაბის სახელი იყო წმინდათა წმინდა. თუ ვინმესთვის ეს არ არის ხელშეუხებელი, მათ შორის ვინმე ოჯახის წევრისთვის, ეს მათ სინდისზე იყოს", - ამბობდა სააკაშვილი.
ხელისუფლების ცვლილების შემდეგ, პროკურატურამ 2012 წლის ნოემბერში აღნიშნული საქმის გამოძიება განაახლა და მას შემდეგ დეტალების დაკონკრეტების გარეშე ამბობდა, რომ გამოძიებაში პროგრესია.
FBI-ის დასკვნას ეჭვქვეშ აყენებდა 2014 წლის მარტში პრემიერმინისტრი ირაკლი ღარიბაშვილი. მისი თქმით, ბიუროს თანამშრომლები საქართველოში ჟვანიას სიკვდილიდან რამდენიმე დღეში ჩამოვიდნენ და მათ რა მოცემულობაც დაახვედრეს, იმ მასალებზე დაყრდნობით დაიწერა ეს დასკვნაც.
ნახშირჟანგით ინტოქსიკაციას ასახელებდა გარდაცვალების მიზეზად სასამართლო ექსპერტიზის ეროვნული ბიუროს სასამართლო-სამედიცინო ექსპერტიზაც. 2014 წლის 20 მარტს მთავარმა პროკურატურამ ექსპერტიზის განყოფილების ყოფილი გამგე ლევან ჩაჩუა დააკავა. უწყების ცნობით, გვამების გამოკვლევისას ჩაჩუამ გამოიჩინა გულგრილობა და არაჯეროვნად შეასრულა სამსახურებრივი მოვალეობა. კერძოდ, პროკურატურის მტკიცებით, მან სრულყოფილად არ აღწერა გვამებზე არსებული დაზიანებები მაშინ, როდესაც გვამებს აშკარად აღენიშნებოდა სიცოცხლისდროინდელი დაზიანებები. აღსანიშნავია, რომ გასული წლის ნოემბერში ჩაჩუა 10000-ლარიანი გირაოს სანაცვლოდ გაათავისუფლეს.
ჩაჩუას დაკავებიდან ერთ დღეში ზურაბ ჟვანიას დაცვის ცვლის ყოფილი უფროსი მიხეილ ძაძამია სამსახურებრივი გულგრილობის ფაქტზე დააკავეს. პროკურატურის განცხადებით, სახელმწიფო დაცვის სპეციალური სამსახურის შესახებ კანონმდებლობის შესაბამისად, პრემიერმინისტრის დაცვას არ შეეძლო, მიეტოვებინა დასაცავი ობიექტი. ამავე მუხლით ბრალი წარედგინა დაცვის ყოფილ უფროსს კობა ხარშილაძესაც, რომელიც დღემდე პატიმრობაში რჩება. ძაძამია 2014 წლის დეკემბერში 2000-ლარიანი გირაოს სანაცვლოდ გათავისუფლდა.
ჩაჩუასა და ძაძამიას დაკავებამდე, 2014 წლის 19 მარტს Youtube-ზე hakim pasha-ს სახელით გარდაცვლილი ზურაბ ჟვანიასა და რაულ უსუპოვის ფოტოკოლაჟი, სათაურით Saakashvili killed Mr. zurab zhvania (სააკაშვილმა მოკლა ბატონი ზურაბ ჟვანია) აიტვირთა. მაშინ პროკურატურამ ტაბულას განუცხადა, რომ კადრები ავთენტური იყო, რადგან ისინი საქმის მასალებში მოიპოვებოდა. აღსანიშნავია, რომ 2014 წლის სექტემბერში თბილისის საქალაქო სასამართლომ hakim pasha-ს სახელით გავრცელებული ვიდეომასალა ზურაბ ჟვანიას გარდაცვალების საქმეზე მტკიცებულებად დაუშვა.
ზურაბ ჟვანიასა და რაულ უსუპოვის გარდაცვალების საქმეზე პროკურატურამ ბრალი კიდევ 2 პირს მიმდინარე წლის 4 თებერვალს წარუდგინა. უწყება ყოფილ მთავარ პროკურორს მამუკა გვარამიას და ლევან სამხარაულის სახელობის სასამართლო ექსპერტიზის ეროვნული ბიუროს უფროსის ყოფილ მოადგილეს როსტომ ლაზარიას გამოძიების პროცესში სამსახურებრივი უფლებამოსილების გადამეტებასა და მტკიცებულებების ფალსიფიკაციას ედავება. დაცვის მხარის მოთხოვნის საფუძველზე სასამართლომ გვარამია და ლაზარია 3000-ლარიანი გირაოს სანაცვლოდ გაათავისუფლა.
