საქართველოს პრეზიდენტმა გიორგი მარგველაშვილმა 9 აპრილს დაღუპულთა ხსოვნას პატივი მიაგო. პრეზიდენტი რუსთაველის გამზირზე მდებარე 9 აპრილის მემორიალთან მეუღლესთან, მრჩევლებთან და ადმინისტრაციის წარმომადგენლებთან ერთად იმყოფებოდა. მათ მემორიალი ყვავილებით შეამკეს.
"1989 წელს აქ დაღვრილი პატრიოტების უმანკო სისხლი ორი წლის მერე საქართველოს დამოუკიდებლობის აქტში გამოიხატა. ბუნებრივია, ჩვენ ყველა წელს პატივს მივაგებთ იმ ადამიანებს, ვინც აქ იცავდა ჩვენს მომავალ სახელმწიფოებრიობას. ბუნებრივია, მადლობას ვუხდით მათ იმ ღვაწლისთვის, რამაც საქართველოს დამოუკიდებლობა მოუტანა. საქართველოს პირველმა პრეზიდენტმა მაშინ ეს აქტი სწორედაც ამ ტრაგიკულ მოვლენებს დაუკავშირა, რითაც ხაზი გაუსვა ჩვენი ქვეყნის დამოუკიდებლობისთვის ბრძოლის ძალიან რთულ და მნიშვნელოვან გზას", - განუცხადა გიორგი მარგველაშვილმა ჟურნალისტებს.
