საქართველოს პროკურატურის განცხადებით, გენეტიკური ექსპერტიზის საფუძველზე დადგინდა, რომ იური ვაზაგაშვილის მკვლელობის ადგილიდან ამოღებული ხელყუმბარის ფალიის სახელურზე დაფიქსირებული მეორე დნმ შს სამინისტროს გენინსპექციის თანამშრომელ როინ ასანიძეს არ ეკუთვნის. როგორც ცნობილია, მკვლელობაში ბრალდებული გია სოსანაშვილი და მისი ადვოკატი სოსო ჯოგლიძე ამბობდნენ, რომ მეორე დნმ სწორედ როინ ასანიძეს ეკუთვნოდა. უწყების მტკიცებით, სოსანაშვილისა და ჯოგლიძის განცხადება ტყუილი და მოსალოდნელი სისხლისსამართლებრივი პასუხისმგებლობისგან თავის არიდების "უსუსური მცდელობაა".
"იური ვაზაგაშვილის განზრახ მკვლელობის საქმეზე გენეტიკური ექსპერტიზა დასრულებულია, რომლის შედეგებსაც დაპირებისამებრ, საქართველოს მთავარი პროკურატურა ასაჯაროებს. კერძოდ: გენეტიკური ექსპერტიზის დასკვნით დადგინა, რომ შს სამინისტროს გენერალური ინსპექციის თანამშრომლის რ. ასანიძის გენეტიკური პროფილი არ არის ნივთმტკიცებებზე, შესაბამისად, 2015 წლის 20 იანვარს შემთხვევის ადგილიდან ამოღებული ხელყუმბარის ამფეთქი ფალიის სახელურზე აღმოჩენილი დნმ-ი არ ეკუთვნის რ. ასანიძეს.
საზოგადოებას შევახსენებთ, რომ ბრალდებულ გიორგი სოსანაშვილისა და მისი ინტერესების დამცველი ადვოკატის შუამდგომლობის საფუძველზე, 2015 წლის 25 აპრილს, შს სამინისტროს გენერალური ინსპექციის თანამშრომლის - როინ ასანიძისაგან დაცვის მხარისა და დაზარალებული მხარის წარმომადგენლების თანდასწრებით, აღებული იქნა დნმ-ის ნიმუში, რომელიც საექსპერტო კვლევისათვის გადაეგზავნა ექსპერტიზის ბიუროს.
2015 წლის 28 აპრილს, გ. სოსანაშვილის ადვოკატისა და გარდაცვლილ იური ვაზაგაშვილის წარმომადგენლის თანდასწრებით საექსპერტო ბიუროში გაიხსნა მთავარ პროკურატურაში მათივე თანდასწრებით დალუქული დნმ-ის ნიმუში და ჩაუტარდა გენეტიკური კვლევა.
ამრიგად, ექსპერტიზის დასკვნით ცალსახად დადასტურდა, რომ ნივთმტკიცებაზე აღმოჩენილი მეორე დნმ-პროფილი არ ეკუთვნის შს სამინისტროს გენერალური ინსპექციის თანამშრომელს, როგორც ამას სოსანაშვილი და მისი ადვოკატი საჯაროდ აცხადებენ და ყველასათვის ნათელია, რომ ბრალდებულ გ. სოსანაშვილისა და მისი ინტერესების დამცველი ადვოკატის ს. ჯოგლიძის განცხადებები იყო და არის ტყუილი, მოკლებულია ყოველგვარ საფუძველს, მიზნად ისახავს მხოლოდ და მხოლოდ საზოგადოების შეცდომაში შეყვანას და წარმოადგენს მოსალოდნელი სისხლისსამართლებრივი პასუხისმგებლობისგან თავის არიდების უსუსურ მცდელობას".
