თბილისი-2015

ღარიბაშვილი: ჩვენი ყველაზე დიდი წარმატებული პროექტი ოლიმპიური სოფელია

facebook.com/GaribashviliOfficial

საქართველოს პრემიერმინისტრმა ევროპის ახალგაზრდული ოლიმპიური ფესტივალის ოფიციალურ დელეგაციას ოფიციალურ სადილზე უმასპინძლა. საქართველოს მთავრობის ადმინისტრაციის პრესსამსახურის ცნობით, ირაკლი ღარიბაშვილმა სტუმრებს საქართველოსთვის გამოცხადებული ნდობისთვის მადლობა გადაუხადა და მთავრობის მიერ ოლიმპიური ფესტივალის მოსამზადებლად განხორციელებულ პროექტებზე ისაუბრა.

"ჩვენთვის დიდი პატივია ევროპის ახალგაზრდული ოლიმპიური ფესტივალის მასპინძლობა. მინდა მადლობა მოვახსენო ევროპის ოლიმპიურ კომიტეტებს და პირადად ბატონ პატრიკ ჰიკს საქართველოსთვის გამოცხადებული ნდობისთვის. განსაკუთრებულ მადლობას მოვახსენებ ევროპის საკოორდინაციო კომისიას და მის წევრებს - ჯოზეფ ლიბასა და კატერინა ნიცოვას მთელი ამ ხნის განმავლობაში თბილისი 2015-ის საორგანიზაციო საკითხებში ასეთი აქტიური ჩართულობისთვის. ჩვენი ქვეყანა ამ დღეებისთვის განსაკუთრებულად ემზადებოდა. ჩვენ განვახორციელეთ მასშტაბური პროექტები, რათა ღირსეულად დავხვედროდით სტუმრებს. ყველაზე დიდი პროექტი, რომელიც ჩვენ წარმატებით განვახორციელეთ, გახლავთ ოლიმპიური სოფელი. იგი მთლიანად პასუხობს თანამედროვე სტანდარტებს და ამაში თქვენ თავად დარწმუნდებით", - მიმართა სტუმრებს პრემიერმინისტრმა.

ირაკლი ღარიბაშვილმა მადლობა გადაუხადა ახალგაზრდებს, რომლებიც აქტიურად იყვნენ ჩაბმული ფესტივალის სამზადისში და კმაყოფილებით აღნიშნა, რომ 2 ათას მოხალისეს შორის უცხოელებიც იმყოფებოდნენ.

მთავრობის მეთაურის თქმით, დღეს მთელი ქვეყანა სპორტული დღესასწაულის მოლოდინშია.„დარწმუნებული ვარ, ევროპის ახალგაზრდული ოლიმპიური ფესტივალის მასპინძლის საპატიო სტატუსი ჩვენი ქვეყნისთვის გახდება სავიზიტო ბარათი და საერთაშორისო დონის კიდევ არაერთ სპორტულ ღონისძიებას ვუმასპინძლებთ", - განაცხადა ირაკლი ღარიბაშვილმა.

ოლიმპიადის სამზადისში შეტანილი განსაკუთრებული წვლილისთვის საქართველოს პრემიერ-მინისტრს მადლობა გადაუხადა ევროპის ოლიმპიური კომიტეტების პრეზიდენტმა პატრიკ ჰიკმა.
"ბატონო პრემიერმინისტრო, თქვენი უშუალო ჩართულობის გარეშე დღეს ჩვენ აქ არ ვიქნებოდით. სამი დღეა, საქართველოში ვიმყოფები და დავათვალიერე ოლიმპიური ფესტივალისთვის განკუთვნილი თითქმის ყველა ობიექტი, მათ შორის ოლიმპიური სოფელი. მინდა გითხრათ, რომ ნანახით გაოცებული ვარ. თქვენ მართლაც შესანიშნავი სამუშაო შეასრულეთ", - მიმართა პრემიერმინისტრს ევროპის ოლიმპიური კომიტეტების პრეზიდენტმა.

პატრიკ ჰიკმა ირაკლი ღარიბაშვილი ფესტივალის სამზადისში შეტანილი განსაკუთრებული წვლილისთვის დააჯილდოვა. ჯილდოები ასევე გადაეცათ, საქართველოს ეროვნული ოლიმპიური კომიტეტის გენერალურ მდივანს, ემზარ ზენაიშვილს, ეროვნული ოლიმპიური კომიტეტის პრეზიდენტ ლერი ხაბელოვს, თბილისი 2015-ის საორგანიზაციო კომიტეტის თავმჯდომარეს, ალექსი ახვლედიანს, საქართველოს პარლამენტის თავმჯდომარე დავით უსუფაშვილს, თბილისის მერ დავით ნარმანიას.

ოლიმპიურ მოძრაობაში განსაკუთრებული წვლილისა და უშუალო ჩართულობისთვის ეროვნული ოლიმპიური კომიტეტის პრეზიდენტმა ლერი ხაბელოვმა ირაკლი ღარიბაშვილს საქართველოს ეროვნული ოლიმპიური კომიტეტის უმაღლესი ჯილდო - ოლიმპიური ორდენი გადასცა.

კომენტარები