ტერორისტული ორგანიზაცია ალ ქაიდას ყოფილი ლიდერის, უსამა ბინ ლადენის ნახევარდა, მისი მეუღლე და დედა პარასკევს სამხრეთ ინგლისის თავზე იორდანიელ პილოტთან ერთად ავიაკატასტროფაში დაიღუპნენ.
კერძო თვითმფრინავი Embraer Phenom 300-ი რეისს მილანის მალპენსას აეროპორტიდან სამხრეთ ინგლისის ქალაქ ბლექბუშში მიფრინავდა. თვითმფრინავი სავარაუდოდ ტექნიკური გაუმართავობის გამო ბლექბუშის ავტობაზრობის თავზე ჩამოვარდა.
ბინ ლადენების ოჯახი საუდის არაბეთის ერთ-ერთი უმდიდრესი და გავლენიანი ოჯახია. ოჯახის საკუთრებას წარმოადგენს მრავალმილიონიანი საინვესტიციო კორპორაცია BIN LADEN GROUP-ი, რომლის შემოსავლებმაც წინა წელს $2 მილიარდი შეადგინა. ბრიტანელმა სამართალდამცავებმა გვამების საუდის არაბეთში ტრანსპორტირება უკვე განახორციელეს.
ალქაიდას ლიდერი უსამა ბინ ლადენი ამერიკის შეერთებული შტატების შეიარაღებულმა ძალებმა 2011 წელს პაკისტანში მოკლეს.