დიპლომატი საქართველოს დელეგაციის ხელმძღვანელი იყო რუსეთთან მსოფლიო სავაჭრო ორგანიზაციაში გაწევრიანებაზე ხანგრძლივ მოლაპარაკებებში. ქართული მხარის შეთავაზება იყო რუსეთ-საქართველოს საზღვრის აფხაზეთისა და ცხინვალის რეგიონის მონაკვეთზე მონიტორინგის საერთაშორისო ეგიდით წარმოება, რასაც რუსეთი ეწინააღმდეგებოდა. საბოლოოდ, მას შვეიცარიის შეთავაზებულ ვარიანტზე მოუწია დათანხმება - საზღვარზე შვეიცარიის დაქირავებული კერძო კომპანიის მონიტორები გააკონტროლებენ ტვირთის მოძრაობას და ინფორმაციის ელექტრონულ მიმოცვლასაც უზრუნველყოფენ.

მსოფლიო ჩემპიონატზე საქართველოს ნაკრებებიდან ჯერჯერობით მხოლოდ რაგბისტებმა ითამაშეს. თან სამჯერ. შემოდგომით, ახალ ზელანდიაში ჩვენმა გუნდმა სასიამოვნოდ გაგვაოცა: ტოლ-სწორად გაეჯიბრა ოვალური სამყაროს ფლაგმანებს. მამუკა გორგოძე ბორჯღალოსნების ლიდერი იყო: გოძილა-ს ერთნაირად უფრთხოდნენ ვეტერანები და ახალბედები. ნოემბერში ის საფრანგეთის საუკეთესო უცხოელ მორაგბედ დაასახელეს.

ბიძინა ივანიშვილის გამოჩენამ ქართული პოლიტიკური ცხოვრება მნიშვნელოვნად გამოაცოცხლა და მის გარშემო ვნებათაღელვა დღემდე არ წყდება. ბიზნესმენი, რომლის ქონებაც 5.5 მილიარდს აღწევს, ამბიციური გეგმებით გამოვიდა ასპარეზზე. მას არჩევნებში უმრავლესობით გამარჯვება და ქვეყნის სათავეში მოსვლა სურს. ამის შემდეგ ქვეყნის ძირითად პრობლემებთან 2-3 წელიწადში გამკლავებასა და ისეთი დემოკრატიის აშენებას გეგმავს, რომლითაც ევროპასაც გააოცებს. ვინაიდან საქართველოს მოქალაქეობა არ აქვს, პოლიტიკურ პარტიას ვერ აფუძნებს და ამ პირობებში არც სხვა პოლიტიკური ძალის დაფინანსება შეუძლია. ივანიშვილმა დაარსა საზოგადოებრივი მოძრაობა „ქართული ოცნება“.

საქართველოს საკალათბურთო ნაკრებმა ისტორიაში პირველად ითამაშა ევროპის ჩემპიონატზე - სექტემბერში, ლიტვაში ჩვენი გუნდი კონტინენტის 12 საუკეთესოს შორის მოხვდა! ბოლონიის ვირტუსის ქართველი ლეგიონერი ვიქტორ სანიკიძე ბალტიისპირეთში ჩვენი გუნდის ლიდერი იყო - იცავდა, უტევდა, აგდებდა, აფარებდა... სანიკიძე ბოლტივით სწრაფია და ბუბკასავით დაფრინავს, - დაწერა ერთმა მიმომხილველმა იმ დღეებში.

ჩიტი სატირულ-იუმორისტული სადეზინფორმაციო პორტალია, რომელიც 2011 წლის პირველ ივნისს დაფუძნდა. ჩიტის პირველი ვიდეო-სიუჟეტი, რომელიც ბრენდის ცნობადობის აწევას ემსახურებოდა, 2011 წლის ეროვნულ გამოცდებს ეხებოდა და ბოლო პერიოდში ქართული ბიზნესის ფეისბუქზე აქტივობის ბუმს აშარჟებდა. ამ სიუჟეტში გაჟღერებული დეზინფორმაციას პასუხად გამოცდების ეროვნული ცენტრის ოფიციალური განცხადებაც მოყვა. ჩიტის მორიგი წარმატებული ვიდეო სიუჟეტი TLG პროგრამის შარჟი იყო. ჩიტი დიდი პოპულარობით სარგებლობს ქართულ ინტერნეტში, სოციალურ ქსელებში. ბოლო მონაცემებით "ჩიტს" ექვსი ათასზე მეტი ლაიქერი ჰყავს, ხოლო ვირუსული წვდომა დღიურად 38,000 მომხმარებელს შეადგენს. ჩიტის გუნდი არ ერიდება ხუმრობას „ტაბუირებულ“ თემებზე და რეაგირებას საზოგადოებაში აქტუალურ მოვლენებზე.

ნინო ბურჯანაძე, პარლამენტის ყოფილი თავმჯდომარე, „დემოკრატიული მოძრაობა ერთიანი საქართველოსთვის“ ლიდერი. მიმდინარე წლის მაისში სათავეში ჩაუდგა საპროტესტო აქციებს პრეზიდენტის დაუყოვნებლივ გადადგომის მოთხოვნით. იგი ხელისფლებას ძალით დამხობით ღიად ემუქრებოდა. აქციების მონაწილეები შეიარაღებულები იყვნენ ჯოხებითა და თვითნაკეთი ფარებით. ბურჯანაძის მომხრეები 26 მაისის სამხედრო აღლუმის ჩაშლას შეეცადნენ. პოლიციის მიერ აქციის დაშლის დროს, შემთხვევის ადგილიდან გაქცეული ბურჯანაძის კორტეჟმა პოლიციის ერთი თანამშრომელი და ერთი მომიტინგე გაიტანა.

წელს საქართველოში საატესტატო გამოცდები პირველად ჩატარდა. მასში 43 ათას მოსწავლემდე მონაწილეობდა და 10 დღის განმავლობაში გრძელდებოდა. მათგან გამოცდებზე დადგენილი მინიმალური კომპეტენციის ზღვარი დაახლოებით 6000-მა მოსწავლემ ვერ გადალახა. საერთო ჯამში კი, იმ მოსწავლეების ჩათვლით, ვინც თავად არ გამოცხადდა გამოცდებზე, ატესტატი 21% ვერ მიიღო. თითოეული მოსწავლე პერსონალურ კომპიუტერთან მუშაობდა, მათ 2 მეთვალყურე და რამდენიმე ვიდეო-კამერა აკონტროლებდა. ბევრი ფიქრობდა, რომ სპეციალურად ამ გამოცდებისთვის მცირე დროში შექმნილი პროგრამა ვერ მოახერხებდა ამდენი მოსწავლისთვის ცოდნის უპრობლემოდ შემოწმებას, მაგრამ პროცესმა მშვიდად, ყოველგვარი ხარვეზის გარეშე ჩაიარა. მთელ ამ პროცესს მაია მიმინოშვილი პირადად ხელმძღვანელობდა.

წელს საქართველოს კათალიკოს-პატრიარქს საგარეო ურთიერთობებში აქტიური წელი ჰქონდა. ის იმყოფებოდა ბრიტანეთში, თურქეთსა და რუსეთში. პატრიარქმა უმასპინძლა სომხეთის პატრიარქ-კათალიკოს გარეგინ მეორეს. კათალიკოსის ვიზიტები ფართო საზოგადოების განხილვის თემა ხდებოდა. 26 მაისის ოპოზიციის მიტინგის დაშლისას პატრიარქმა განაცხადა, რომ ”დიდი საქმეები” ქუჩაში არ უნდა წყდებოდეს. მანვე მოგვიანებით მხარი დაუჭირა ბიძინა ივანიშვილისთვის მოქალაქეობის მინიჭებას. დემოგრაფიული სიტუაციის გაუმჯობესების მიზნით, პატრიარქმა ყოველი ოჯახის მეოთხე შვილს, რომელსაც მშობლების სურვილის შემთხვევაში თავად მონათლავს, ”სამშობლოსთვის თავდადებული მამულიშვილისა და საქართველოს ეკლესიის საპატრიარქო ტახტის მცველის” ტიტული მიანიჭა.

ამ წლიდან შსს-ის ინიციატივით, საქართველოში მართვის მოწმობის თან ქონა სავალდებულო აღარ არის. კერძო ბიზნესთან თანამშრომლობით რუსთავში გაიხსნა ავტომანქანების გაფორმების ახალი ცენტრი, რამაც პროცედურები მნიშვნელოვნად გაამარტივა. ქვეყანაში გაიხსნა პოლიციის ახალი შენობებიც. შსს-მ წელს საქართველოში განხორციელებული აფეთქებების შემსრულებლების დაკავება განაგრძო - დანაშაულებრივმა ჯგუფებმა მხოლოდ გასულ წელს რუსული სპეცსამსახურების დაკვეთით 7 აფეთქება განახორციელეს, 5 კი აღიკვეთა. მაისში შსს-მ გაავრცელა იმის ამსახველი მასალები, ვიდეო და აუდიო-ჩანაწერები, რომ საპროტესტო აქციების ორგანიზატორები და მათთან დაკავშირებული ჯგუფები შეიარაღებულ პროვოკაციებს გეგმავდნენ სახელმწიფო გადატრიალების მიზნით. ამ ბრალდებით რამდენიმე ათეული ადამიანი დააკავეს. დიდი რეზონანსი გამოიწვია ასევე ფოტოგრაფების საქმემ, რომლებიც ჯაშუშობის ბრალდებით დააკავეს. საბოლოოდ, მათ აღიარეს დანაშაული და საპროცესო გარიგების შედეგად გათავისუფლდნენ.

2011 წელს კახეთში მაცხოვრებელმა გლეხებმა თავი საზოგადოებრივი აქტივობით დაგვამახსოვრეს. სოციალურ ქსელებში განსაკუთრებული პოპულარობა მოიპოვა ლაგოდეხში გადაღებულმა ვიდეომ, სადაც ორი მამაკაცი საზეიმოდ ”ხსნის” სოფლის ტუალეტს. ლენტის გაჭრა და ტექსტი, რომელიც ”ცერემონიალს” თან ახლავს, საქართველოს პრეზიდენტის მიერ ობიექტების გახსნასა და ამ დროს წარმოთქმულ ფრაზებს აშარჟებს. კახელი გლეხები მოგვიანებით კიდევ ერთხელ მოექცნენ ყურადღების ცენტრში. ამჯერად, სოფელ ალავერდის მაცხოვრებლებმა მონასტერთან საპროტესტო აქცია გამართეს. ისინი მეუფე დავითს მოსახლეობის შევიწროებაში და წყალმომარაგების სისტემის დაზიანებაში, ასევე ტყისა და საძოვარი ტერიტორიის მითვისებაში ადანაშაულებდნენ.

რობერტ სტურუა საზოგადოების ყურადღების ცენტრში ქსენოფობიური განცხადებების გაკეთების შემდეგ მოექცა, რასაც რუსთველის თეატრის სამხატვრო ხელმძღვანელის თანამდებობიდან გათავისუფლება მოყვა. 23 სექტემბერს რუსთაველის თეატრში სეზონი რობერტ სტურუას ახალი სპექტაკლით, „ნადირობის სეზონით“ გაიხსნა და ანშლაგით ჩაიარა. ამ სპექტაკლით რეჟისორმა რუსთაველის თეატრში გეგმიური სამუშაო დაასრულა. რობერტ სტურუა 1962 წლიდან მუშაობდა შოთა რუსთველის სახელობის თეატრში. 1979 წლიდან თეატრის მთვარი რეჟისორი და სამხატვრო ხელმძღვანელი იყო. ამჟამად ის მიწვეული რეჟისორის სტატუსით მოსკოვის თეატრ Et Cetera-ში აგრძელებს მუაობას.

წელს იუსტიციის სამინისტრომ არაერთი ახალი რეფორმა და პროექტი განახორციელა. მათ შორის: გაიხსნა იუსტიციის სახლები ბათუმში, რუსთავში, მესტიასა და ქუთაისში. იუსტიციის სახლი ნოვაციაა, სადაც მოქალაქეებს სერვისს ერთდროულად რამდენიმე უწყება სთავაზობს.ის ქვეყნის ყველა დიდ ქალაქში დაარსდება. დაიწყო ელექტონული პირადობის მოწმობების გაცემა. დაინერგა სისხლის სამართლის საქმისწარმოების ინტეგრირებული სისტემა. შეიქმნა არასრულწლოვანთა დანაშაულის პრევენციის სტრატეგია და დანაშაულის სტატისტიკის ელექტრონული მოდული. განრიდება - პასუხისმგებლობის ალტერნატიული ფორმა - წელს სრულწლოვანებზეც გავრცელდა. შეიქმნა ინტერნეტპორტალი ”ქონების ვირტუალური ბირჟა”, რომელიც უძრავი ქონების უსაფრთხოდ ყიდვა-გაყიდვას ემსახურება. დაარსდა მოწმისა და დაზარალებულის კოორდინატორთა სამსახური.

2011 წელს ნაფიც მსაჯულთა სასამართლო ამოქმედდა. ქართული მართლმსაჯულების ისტორიაში პირველად, 12-მა ნაფიცმა მსაჯულმა დამამძიმებელ გარემოებებში ჩადენილი განზრახ მკვლელობის საქმე განიხილა. ნაფიც მსაჯულთა ინსტიტუტის შემოღების ერთერთი მიზანი სასამართლოს მიმართ საზოგადოების ნდობის გაზრდაა: 12 ნეიტრალურ მოქალაქეზე გავლენის მოხდენა უფრო რთულია, ვიდრე მოსამართლეზე, რომელსაც გადაწყვეტილების მიღების სრული უფლებამოსილება აქვს. ნაფიც მსაჯულთა სასამართლო მრავალი კუთხითაა მნიშვნელოვანი: ის განაპირობებს საზოგადოების მეტად ჩართვას კანონის დემოკრატიული აღსრულების პროცესში. ამ გზით მოქალაქეები სასამართლო სისტემაზე საზოგადოებრივ კონტროლს აწესებენ. ეს კი გადაწყვეტილების პროცესში სახელმწიფოს დომინირებას უშლის ხელს. საბოლოო ჯამში, ნაფიც მსაჯულთა სასამართლო ემსახურება კანონის უზენაესობის პრინციპის განმტკიცებას და ძალაუფლების შეკავებისა და გაწონასწორების მნიშვნელოვან ინსტრუმენტს წარმაოდგენს.

2011 წელს საქართველოს მართლმადიდებელი ეკლესიის წმინდა სინოდმა მიიღო უპრეცედენტო დადგენილება, სადაც უმაღლესმა საეკლესიო ორგანომ პირველად დააფიქსირა საკუთარი პოზიცია აღმსარებლობის თავისუფლების შესახებ. „საქართველოს მართლმადიდებელი ეკლესია საქართველოს კონსტიტუციის და საერთაშორისო თანამეგობრობის მიერ საყოველთაოდ აღიარებულ ნორმებზე დაყრდნობით აცხადებს, რომ საქართველოში მცხოვრები ყველა რელიგიური აღმსარებლობის ადამიანი, ისევე როგორც რელიგიური გაერთიანებები, თანასწორია კანონის წინაშე. რელიგიური აღმსარებლობების თავისუფლება არ არის დამოკიდებული იმაზე, თუ რომელ რელიგიურ გაერთიანებას ეკუთვნის საქართველოს ესა თუ ის მოქალაქე.“ ნათქვამია წმინდა სინოდის 5 ივლისის სხდომის ოქმში. მიუხედავად იმისა, რომ სინოდმა რელიგიური გაერთიანებებისთვის სსიპ-სტატუსით დარეგისტრირების შესაძლებლობა არ მოიწონა, მან პირველად გაუსვა ხაზი კანონის წინაშე ნებისმიერი აღმსარებლობის მქონე პირის თანასწორობას.

2011 წლის ივლისში საქართველოს საკანონმდებლო ორგანოს დეპუტატებმა მხარი დაუჭირეს საქართველოს სამოქალაქო კოდექსში რელიგიური გაერთიანებების რეგისტრაციის წესის ცვლილებას. წლების მანძილზე საქართველოში მცხოვრები რელიგიური გაერთიანებების ნაწილი საჯარო სამართლის იურიდიულ პირად რეგისტრაციის უფლების მიცემას ითხოვდა. მათთვის მიუღებელი იყო რელიგიური თემის კერძო სამართლის იურიდიული პირის სტატუსით სარგებლობა. ახალი ცვლილებებით ”საჯარო რეესტრის ეროვნული სააგენტო უფლებამოსილია საჯარო სამართლის იურიდიულ პირად დაარეგისტრიროს საქართველოსთან ისტორიული კავშირის მქონე რელიგიური მიმდინარეობა ან ის რელიგიური მიმდინარეობა, რომელიც ევროპის საბჭოს წევრ ქვეყნებში კანონმდებლობით მიჩნეულია რელიგიად.” დეპუტატებმა საკანონმდებლო ცვლილებები მიიღეს მიუხედავად იმისა, რომ მათი ელექტორატისთვის ყველაზე სანდო ორგანიზაციამ - საქართველოს საპატრიარქომ, ახალი კანონი დაგმო. მართლმადიდებელი ეკლესიის ავტორიტეტულმა არქიმანდრიტმა დეპუტატები დაწყევლა კიდეც. საპარლამენტო მოსმენები მიმდინარეობდა მართლმადიდებელი მრევლის ნაწილის აქტიური პროტესტის ფონზე. 70 დეპუტატს ”ერთიანი ნაციონალური მოძრაობიდან” რომელთაც ხმა მისცეს ცვლილებებს, უცხო ქვეყნის, სომხეთის ინტერესების გატარებაში ადანაშაულებდნენ. ოპოზიციამ მოსმენა პროტესტის ნიშნად დატოვა. მიუხედავად იმისა, რომ კანონმა ვერ აღმოფხვრა საგადასახადო უთანასწორობა საქართველოს საპატრიარქოსა და რელიგიურ უმცირესობებს შორის, მათ ცვლილებები აღმსარებლობის თავისუფლების უზრუნველყოფვაში დიდ ნაბიჯად შეაფასეს.

ბიძინა ივანიშვილის ქართულ პოლიტიკაში გამოჩენასთან ერთად მისი შვილი ბერა ივანიშვილი მუსიკალურ ასპარეზზე გააქტიურდა. 2011 წელს ბერამ არაერთი პოლიტიზირებული ტრეკი გამოუშვა და ათასობით ფანი გაიჩინა. ბერა სოციალურ ქსელში ყველაზე პოპულარული ქართველი მომღერალია მის ოფიციალურ Facebook-ის გვერდს 175 000-ზე მეტი Like აქვს.

დეკანოზი თეოდორე გიგნაძე, საქართველოში ყველაზე პოპულარული მართლმადიდებელი მისიონერია. მისი ქადაგებების ვიდეო თუ აუდიო ჩანაწერები მართლმადიდებელ მრევლში ხელიდან ხელში გადადის. წელს მამა თეოდორემ არაერთი სამისიონერო შეხვედრა გამართა ქართულ საგანმანათლებლო დაწესებულებებში. მისი სიტყვის მოსასმენად შეკრებილი ადამიანების სიმრავლე ავსებდა თითქმის ყველა ზომის აუდიტორიას. დეკანოზის ქადაგებებში საზოგადოებისთვის ყველაზე რეზონანსული შავკანიანებს შესახებ კომენტარი აღმოჩნდა, რომელიც არაერთმა ადამიანმა რასისტულად და ქსენოფობიურად შეაფასა. კრიტიკული პუბლიკაციების საპასუხოდ, თსუ-ს რექტორმა ალექსანდრე კვიტაშვილმა განაცხადა, რომ მისი რექტორობის პერიოდში გიგნაძე ვეღარ შევა უნივერსიტეტში.

წარმოშობით ფინელმა ჰოლივუდის რეჟისორმა საქართველოს ისტორიაში ყველაზე ძვირადღირებული ფილმი გადაიღო. რენი ჰარლინმა ნამუშევარი ”აგვისტოს 5 დღე” რუსეთ-საქართველოს 2008 წლის ომის პერიპეტიებს ასახავს და უცხოელი ჟურნალისტის თვალით დანახულ ამბავს ყვება.

წლის განმავლობაში ტელეკომპანია მაესტრომ გააფართოვა მაუწყებლობა, მუშაობა დაიწყო რამდენიმე ახალმა გადაცემამ. ამან ტელეკომპანიის რეიტინგი გაზარდა. მაესტრომ წლის ბოლოს სკანდალით მიიქცია ფართო აუდიტორიის ყურადღება, რაც მფლობელებსა და მმართველ კომპანიას შორის დაპირისპირებას მოჰყვა. მმართველი კომპანიის მფლობელი ეროსი კიწმარიშვილი ღობეზე გადაძვრა და ისე შევიდა ტელეკომპანიის შენობაში, სადაც ასევეიმყოფებოდნენ არხის ერთ-ერთი მფლობელი მამუკა ღლონტი და მაესტროს თანაშრომლები. დაძაბულობის შემდეგ ამუკანასკნელებმა დატოვეს შენობა. ამჟამად ტელეკომპანია რადიო მაესტროს სტუდიიდან შეზღუდულად მაუწყებლობს. მმართველი კომპანიის მოთხოვნით კი, მაესტროს 100% წილი დაყადაღებულია. უთანხმოება მხარეებსშორის გრძელდება.