"მიწისქვეშა პარკინგის მოსაწყობად, დაინტერესებულ პირებს მიწის ნაკვეთები 25-წლიანი იჯარის ნაცვლად, საკუთრებაში გადაეცემათ." - ამის შესახებ თბილისის მერმა კახა კალაძემ დღეს ისაუბრა. კალაძის თქმით, რადგანაც მიწისქვეშა პარკინგის მოწყობასთან დაკავშირებით გამოცხადებული ინტერესთა გამოხატვა სასურველი შედეგით ვერ დასრულდა, ინტერესთა გამოხატვა კიდევ ერთხელ და შეცვლილი პირობებით გამოცხადდება.
„გასულ კვირას ვაცნობეთ საზოგადოებას, რომ ამ კონკრეტულ პროექტზე ადამიანებმა ინტერესი არ გამოხატეს. არის მოცემული სამი ლოკაცია - სადგურის მოედნის, მეტროსადგურ „ვარკეთილისა“ და გეგეშიძის სკვერის ტერიტორიები, რომლებიც ბაზრის კვლევის საფუძველზეა შერჩეული და სწორედ ის ადგილებია, სადაც მოსახლეობის მოთხოვნა საკმაოდ მაღალია. აქედან გამომდინარე, თბილისის მერია მზადაა, კერძო სექტორთან და ბიზნესთან ერთად, მიმდინარე კვირაში ინტერესთა გამოხატვა კიდევ ერთხელ გამოაცხადოს“, - აღნიშნა დედაქალაქის მერმა.
მისივე თქმით, არის მოლოდინი, რომ ამჯერად, ბიზნესის მხრიდან ინტერესის გამოხატვა მაღალი იქნება. დედაქალაქის მერის თქმით, ჯამურად, სამივე ლოკაციის შემთხვევაში, 715
ავტომობილისთვის განკუთვნილი მიწისქვეშა პარკინგის მოწყობა იგეგმება.
„ჩვენ გვქონდა ბიზნესის წარმომადგენლებთან შეხვედრა მას შემდეგ, რაც ინტერესი არ გამოიხატა. მათ კიდევ ერთხელ, დეტალურად გავაცანით პროექტი და ავუხსენით მისი მნიშვნელობა. ძალიან დიდი იმედი მაქვს, რომ ბიზნესი დაინტერესდება. ამასთან, გამოცხადებული გვქონდა, რომ მიწის ნაკვეთებს დაინტერესებულ პირებს 25-წლიანი იჯარით გადავცემდით, თუმცა ამას ვცვლით და ნაკვეთებს ერთ ლარად, საკუთრებაში გადავცემთ“, - აღნიშნა კახა კალაძემ.
მიწიქვეშა პარკინგების მოსაწყობად მერიის მიერ გამოცხადებული ინტერესთა კონკურსი რამდენჯერმე უშედეგოდ დასრულდა, რადგან ინტერესი არცერთმა კომპანიამ გამოხატა. ამის გამო მერიამ პირობები რამდენჯერმე შეცვალა.
