29 ივლისს კონტინენტური ჩინეთის ჰონგ-კონგისა და მაკაოს საგარეო საქმეთა სამინისტროს წარმომადგენელმა იანგ კუანგმა ჰონგ-კონგში "რადიკალების მიერ ჩადენილი ბოროტი და კრიმინალური აქტები "დაგმო.
იანგ კუანგმა თქვა, რომ მათი აზრით, "ჰონგ-კონგში ყველაზე საშიში ისაა, რომ კრიმინალი ეფექტურად არ შეაჩერეს".
"ჩვენ გვჯერა, რომ ჰონგ-კონგის მთავარი პრიორიტეტი ძალადობრივი და უკანონო ქმედებების ჩამდენი პირების დასჯა, რაც შეიძლება მალე სოციალური წესრიგის აღდგენა და კარგი ბიზნეს გარემოს შენარჩუნებაა," - აღნიშნა მეორე სპიკერმა სუ ლუინგმა.
ჩინეთის მთავრობის წარმომადგენლები ამ კომენტარებით ჰონგ-კონგში 28 ივლისის აქციას გამოეხმაურნენ. 28 ივლისს პოლიციამ აქცია რეზინის ტყვიებით და ცრემლსადენი გაზით დაშალა.
უკვე თვეზე მეტია, რაც ჰონგ-კონგის ქუჩებში მილიონობით ადამიანი იმ კანონპროექტის წინააღმდეგ გამოდის, რომლითაც დამნაშავეების კონტინენტურ ჩინეთში გაგზავნა იქნება შესაძლებელი. კრიტიკოსები მიიჩნევენ, რომ აღნიშნული კანონი საფრთხეს შეუქმნის ქალაქის იურიდიულ დამოუკიდებლობას.
მიუხედავად იმისა, რომ ჰონგ-კონგის ლიდერმა კერი ლამმა "განუსაზღვრელი ვადით" შეაჩერა ჩინეთში ექსტრადიციის კანონპროექტი და მომიტინგეებს ბოდიშიც მოუხადა, საპროტესტო აქციები კვლავ გრძელდება - ისინი კერი ლამის გადადგომას, კანონის სრულ გაწვევასა და მეტ დემოკრატიას ითხოვენ.
მომიტინგეები შიშობენ, რომ ლამის მმართველობის სათავეში ყოფნით ჰონგ-კონგში ჩინეთის გავლენა გაიზრდება.
ჰონგ-კონგის პოლიციამ აქციები ცრემლსადენი გაზითა, ხელკეტით, წიწაკის სპრეით და სხვა საშუალებებით არაერთხელ დაარბიეს. აქციის მონაწილეებს პროჩინელი მოძალადეთა ჯგუფიც დაუპირისპირდა.
ჰონგ-კონგის საკანონმდებლო სისტემას პეკინის მომხრე უმრავლესობა აკონტროლებს. პეკინის იურიდიული სისტემა ადამიანის უფლებების დარღვევით მოქმედებს, თუმცა ჰონგ-კონგის მთავრობა მოსახლეობას ეუბნება, რომ ექსტრადიციის კანონში საშიში არაფერია.
საკამათო კანონი არა მხოლოდ ჰონგ-კონგის იურიდიულ დამოუკიდებლობას, არამედ მსოფლიოს ერთერთ უდიდეს ფინანსურ ცენტრს უქმნის საფრთხეს. არაერთმა ბიზნესმენმა თქვა, რომ კანონი საფრთხეს შეუქმნის იმ თავისუფლებებს, რითაც აქ მყოფი ბიზნესმენები სარგებლობენ, გააქრობს ინვესტორთა ნდობას და ქალაქის კონკურენტულ უპირატესობას.
1997 წელს ბრიტანეთმა ტერიტორია ჩინეთს გადასცა "ერთი ქვეყნა, ორი სისტემის" პირობებით - ე.წ. ძირითადი კანონი, მინი კონსტიტუცია ჰონგ-კონგს განსაკუთრებულ ავტონომიას ანიჭებს, რაც კონტინენტური ჩინეთის კომუნისტური წყობისგან გამოხატვის თავისუფლებით, შეკრების თავისუფლებით, თავისუფალი მედიითა და დამოუკიდებელი სასამართლოთითაც განსხვავდება. ჰონგ-კონგს ასევე აქვს საკუთარი ეკონომიკური სისტემის მოდელი და საკუთარი ვალუტა. პეკინი კი მის საგარეო ურთიერთობებს, თავდაცვასა და ვიზის საკითხებს აკონტროლებს.
ძირითად კანონს ვადა 2047 წელს გადის. ამის შემდეგ ჰონგ-კონგის ავტონომიის ბედი ჯერჯერობით უცნობია.
