ხეჩინაშვილის კლინიკის ექიმის ინფორმაციით, ცოტნე გამსახურდიას მდგომარეობა კვლავ მძიმეა, თუმცა სტაბილური.
"ამ დღეების განმავლობაში დინამიკა არის უცვლელი. ჰემოდინამიკური მონაცემები არის სტაბილური და არ საჭიროებს დამატებით ჩარევას"- ამბობს ანესთეზიოლოგიისა და რეანიმაციის დეპარტამენტის განყოფილების ხელმძღვანელი ნიკოლოზ კვაჭაძე.
საქართველოს პირველი პრეზიდენტის შვილი, ცოტნე გამსახურდია თბილისში 19 დეკემბერს დაჭრეს. ის გულ-მკერდისა და თავის არეში ჩატარებული ორი მძიმე ოპერაციის შემდეგ რეანიმაციაში, მართვით სუნთქვაზე რჩება.
შინაგან საქმეთა სამინისტრომ გამოძიება განზრახ მკვლელობის მცდელობის მუხლით დაიწყო და საქმეზე 5 პირი დააკავა. აქედან დაკავებულ ორ პირს ბრალდება დაუმძიმდა. მათ ბრალი დამამძიმებელ გარემოებაში ჯგუფურად ჩადენილ განზრახ მკვლელობის მცდელობის მუხლით წარედგინათ. დაკავებულებიდან სამ პირს კი ბრალი განსაკუთრებით მძიმე დანაშაულის შეუტყობინებლობის მუხლით წარედგინა.