ევროსაბჭოს საპარლამენტო ასამბლეაში საქართველოს შესახებ თანამომხსენებლები ტიტუს კორლატინი და კლოდ კერნი განცხადებას ავრცელებენ, სადაც კიდევ ერთხელ მიესალმებიან 2020 წლის საპარლამენტო არჩევნების შესახებ ქართულ ოცნებასა და ოპოზიციას შორის დადებულ შეთანხმებას.
თანამომხსენებლები წერენ, რომ 8 მარტის შეთანხმება საქართველოს დემოკრატიული კონსოლიდაციისთვის შესაძლებლობების ფანჯარას ხსნის.
"კვლავ, საქართველოს პოლიტიკურ გარემოში ახალი ენერგიის შესაქმნელად შესაძლებლობის ფანჯარა არსებობს, რომელიც კარგად აისახება ამ რეფორმების განხორციელებაზე და რომელსაც შეუძლია საქართველოს დემოკრატიულ კონსოლიდაციას ახალი სტიმული მისცეს. როგორც საქართველოს დიდი ხნის მეგობრები, ჩვენ მზად ვართ, დავეხმაროთ ყველა ჩართულ მხარეს ყველა საშუალებით, რომლითაც შეგვიძლია,"- წერია განცხადებაში.
განცხადების მიხედვით, თანამომხსენებლები მიესალმებიან კონსტრუქციულ სულისკვეთებას, რომლის ფარგლებშიც საარჩევნო სისტემასთან დაკავშირებული შეთანხმების თანახმად კონსტიტუციური შესწორება მოხდება, მათ შორის "მეტად სენსიტიურ საკითხზე", რომელიც საარჩევნო ოლქებს ეხება.
"როგორც გასულ კვირას განვაცხადეთ, ეს შეთანხმება მუდმივი დაძაბულობისა და პოლიტიკური გარემოს პოლარიზაციის შემცირებას დაეხმარება, რაც საქართველოში დემოკრატიულ პროცესზე ახდენდა გავლენას. ჩვენ მოვუწოდებთ ყველა პოლიტიკურ აქტორს, შეინარჩუნეთ ეს მომენტი და გამოხატეთ ერთნაირი პოლიტიკური ნება და მომწიფებულობა, რათა იპოვოთ შეთანხმება სხვა საკითხებზეც, რომელიც მათ ყოფს,"- წერია განცხადებაში.
განცხადების მეორე ნაწილი სასამართლო დამოუკიდებლობას ეხება. თანამომხსენებლები ქართულ ოცნებას მოუწოდებენ, შეამცირონ წინასწარი პატიმრობა, რომელიც მათივე განმარტებით, ჯერ კიდევ ხშირია და ეწინააღმდეგება ევროპულ სტანდარტებს.
"თანამომხსენებლები მიესალმებიან სასამართლო რეფორმის მეოთხე ტალღის მიღებას და გამოხატავენ იმედს, რომ ეს რეფორმა დაუყონებლივ და თანმიმდევრულად განხორციელდება. ისინი ხელისუფლებას მოუწოდებენ, სასამართლოს დამოუკიდებლობის გასაძლიერებლად, მათ შორის იუსტიციის უმაღლესი საბჭოს ფუნქციონირებისას, გზების მოძებნა გააგრძელონ. თანამომხსენებლები ასევე მიესალმებიან ხელისუფლების გადაწყვეტილებას, რომ უმრავლესობამ ამ საპარლამენტო სესიის ფარგლებში დამატებით აღარ დაამტკიცოს უზენაესი სასამართლოს მოსამართლეები.
თანამომხსენებლები დაჟინებით მოუწოდებენ ხელისუფლებას, უზენაესი სასამართლოს ახალი მოსამართლეები მხოლოდ მას შემდეგ წარადგინონ, რაც მოქმედი კანონმდებლობა დანიშვნებთან დაკავშირებით შეიცვლება იმგვარად, რომ გაითვალისწინოს ხარვეზები, რომლებიც ბოლო დანიშვნების ციკლში გამოვლინდა. ისინი ასევე დაჟინებით მოუწოდებენ ხელისუფლებას, რომ ვენეციის კომისიის დანარჩენი რეკომენდაციებიც გაითვალისწინოს, კერძოდ ფარული კენჭისყრის გაუქმება და დასაბუთებული გადაწყვეტილებების შემოტანა და შერჩევის კრიტერიუმების უნიფიცირება და გამჭვირვალეობა, რათა უზრუნველყოს ჭეშმარიტად დამსახურებებზე დაყრდნობილი დანიშვნის პროცესი.
მიღწეული პროგრესის დადებითად შეფასების ფონზე, თანამომხსენებლები ხელისუფლებას მოუწოდებენ, კიდევ უფრო შეამცირონ წინასწარი პატიმრობის გამოყენება, რომელიც ჯერ კიდევ ხშირია, ეწინააღმდეგება ევროპულ სტანდარტებს და ხელი შეუწყო ბრალდებებს, რომ ის პოლიტიკურად მოტივირებული მიზნებისთვის ინსტრუმენტად გამოიყენება.
თანამომხსენებლები მიესალმებიან ხელისუფლების პირობას, რომ მმართველი უმრავლესობა შექმნის ადმინისტრაციული სამართალდარღვევის ახალ კანონმდებლობას, რადგან მოქმედი კოდექსი საბჭოთა ეპოქისაა, ეწინააღმდეგება ევროპულ სტანდარტებსა და საქართველოს კონსტიტუციურ ნორმებს და მოწყვლადია ბოროტად გამოყენებისთვის,"- წერია განცხადებაში.
