აშშ-ს საელჩო საოკუპაციო ხაზთან საქართველოს მოქალაქის დაკავებაზე ავრცელებს განცხადებას, რომელშიც შეშფოთებას გამოთქვამს რუსეთის მიერ მართული ძალების მხრიდან საქართველოს მოქალაქის მიმართ სროლის, დაჭრის და დაკავების გამო და მომხდარს გმობს.
"ამერიკის შეერთებული შტატების საელჩო საქართველოში შეწუხებულია და ღრმა შეშფოთებას გამოთქვამს ცნობებზე რუსეთის მიერ მართული უსაფრთხოების ძალების მხრიდან საქართველოს მოქალაქის მიმართ გასროლის, დაჭრისა და დაკავების ფაქტთან დაკავშირებით 11 ივლისს, სოფელ ქვემო ჭალის მახლობლად, რუსეთის მიერ ოკუპირებული სამხრეთ ოსეთის ადმინისტრაციული გამყოფი ხაზის მიმდებარედ. ჩვენ ვგმობთ გასროლისა და დაკავების ფაქტს, რაც კიდევ ერთი გამოვლინებაა სიტუაციის გამწვავებისკენ მიმართული პროვოკაციული ქმედებებისა, რასაც რუსეთის მიერ მართული ძალები ამ ბოლო კვირების განმავლობაში ახორციელებენ."
აშშ-ს საელჩო საოკუპაციო ძალების წარმომადგენლებს მოუწოდებს, დაუყოვნებლივ გაათავისუფლონ საქართველოს მოქალაქე:
"ასეთი სახიფათო და გაუმართლებელი ინციდენტი არ მოხდებოდა, თუ რუსეთი შეასრულებდა 2008 წლის ცეცხლის შეწყვეტის შეთანხმებით ნაკისრ ვალდებულებებს, რომელთა შორისაა, შეიარაღებული ძალების გაყვანა კონფლიქტამდე არსებულ პოზიციებზე და ჰუმანიტარულ დახმარებაზე შეუფერხებელი წვდომის დაშვება. ჩვენ მოვუწოდებთ, დაუყოვნებლივ გათავისუფლდეს ამ ინციდენტის დროს დაკავებული საქართველოს მოქალაქე."
აშშ-ის საელჩოს განცხადებაში კიდევ ერთხელ აფიქსირებენ მხარდაჭერას საქართველოს სუვერენიტეტის და ტერიტორიული მთლიანობის მიმართ და რუსეთს მოუწოდებენ, შეასრულოს 2008 წლის ცეცხლის შეწყვეტის შეთანხმება.
"ამერიკის შეერთებული შტატების მხარდაჭერა საქართველოს სუვერენიტეტისა და ტერიტორიული მთლიანობის მიმართ ურყევია. მნიშვნელოვანია, განსაკუთრებით მოსახლეობის უსაფრთხოებისთვის, რომ რუსეთმა შეწყვიტოს დესტაბილიზაციისკენ მიმართული ქმედებები, შეასრულოს 2008 წლის ცეცხლის შეწყვეტის შეთანხმების ვალდებულებები და შეწყვიტოს საქართველოს ტერიტორიის ოკუპაცია."
კასპის მუნიციპალიტეტში მდებარე სხვილოს ციხესთან არსებულ საოკუპაციო ხაზთან რუსმა ოკუპანტებმა საქართველოს მოქალაქე 11 ივლისს დააკავეს.
სახელმწიფო უსაფრთხოების სამსახურის განცხადებაში ნათქვამია, რომ დაკავების პროცესში, რუსეთის საოკუპაციო ძალების წარმომადგენლებმა ის ცეცხლსასროლი იარაღით ფეხის არეში დაჭრეს.
განცხადება გაავრცელა ევროკავშირის სადამკვირვებლო მისიამაც, რომელშიც ადასტურებს, რომ ცხელი ხაზი ამუშავებულია და უზრუნველყოფენ ინფორმაციის გაცვლას.
"ევროკავშირის სადამკვირვებლო მისია ახლოდან დააკვირდება სროლის ინციდენტის და შემდგომ დაკავების საქმეს. ამ კონტექსტში, მისიის ხელმძღვანელი მარკ შჩიგელი კიდევ ერთხელ უსვამს ხაზს ერგნეთის ინციდენტთა პრევენციის და რეაგირების მექანიზმის, როგორც რეგულარული დიალოგის შესაფერისი ფორუმის სწრაფად აღდგენის მნიშვნელობას". - ნათქვამია განცხადებაში.
