TikTok

ახალი ბრძანების თანახმად აშშ-ში კომპანიებს Tiktok-თან და WeChat-თან კავშირის გაწყვეტა მოუწევთ

0 კომენტარი
ფოტო: GETTY IMAGES

აშშ-ს პრეზიდენტმა დონალდ ტრამპმა ხელი მოაწერა ორ აღმასრულებელ ბრძანებულებას, რომელთა თანახმადაც, ამერიკულ კომპანიებს 45 დღეში მოუწევთ ყოველგვარი ბიზნეს კავშირი გაწყვიტონ TikTok-სა და WeChat-თან.

ვიდეო პლატფორმა TikTok-ს ჩინური კომპანია ByteDance-ი ფლობს, ხოლო Facebook-ის მსგავსი პლატფორმა WeChat-ის კონგლომერატ Tencent-ს ეკუთვნის.

ტრამპის განცხადებით, გადაწყვეტილება ეროვნული უსაფრთხოების დაცვას ემსახურება. პრეზიდენტმა ორივე აპლიკაცია “საფრთხედ” მოიხსენია. 

ბრძანებულებაში დონალდ ტრამპმა აღნიშნა, რომ აშშ-ში ჩინური კომპანიების მიერ შექმნილი მობილური აპლიკაციების გავრცელება საფრთხის შექმნას განაგრძობს ეროვნული უსაფრთხოების, საგარეო პოლიტიკისა და აშშ-ს ეკონომიკისთვის ; Tiktok-ის მიერ ინფორმაციის მოგროვებამ, შესაძლოა, შესაძლებელი გახადოს აშშ-ს სახელმწიფო სექტორში დასაქმებულთა თვალთვალი, შანტაჟისთვის პირადი ინფორმაციის მოგროვება ან კორპორატიული ჯაშუშობა და არსებობს იმის საფუძვლიანი ეჭვიც, რომ Tiktok-ი ცენზურას ადებს ვიდეოებს, რომელსაც პოლიტიკურად შეუსაბამოდ მიიჩნევს, მაგალითად უიღურებთან და ჰონგ-კონგის დემონსტრაციებთან დაკავშირებულ კონტენტს.

კომპანიებს ByteDance-სა და Tenecent-ს აშშ-ს პრეზიდენტის გადაწყვეტილებასთან დაკავშირებით კომენტარი არ გაუკეთებიათ.

საუბარი ჩინური სოცმედია აპლიკაციების აკრძალვაზე განსაკუთრებით აქტუალური გახდა უკანასკნელ პერიოდში. ივლისის დასაწყისში Fox News-თან ინტერვიუში საუბრისას აშშ-ს სახელმწიფო მდივანმა, მაიკ პომპეომ აღნიშნა, რომ აშშ განიხილავდა ჩინური სოციალური მედიააპლიკაციების, მათ შორის TikTok-ის აკრძალვის შესაძლებლობას.

ივნისში ინდოეთმა TikTok-ი, WeChat-ი და კიდევ 57 ჩინური აპლიკაცია აკრძალა. ინდოეთის ინფორმაციით, ტექნოლოგიის სამინისტრომ გადაწყვეტილება მას შემდეგ მიიღო, რაც მათზე სხვადასხვა წყაროდან არაერთი საჩივარი მიიღო, რომ აპლიკაციებით იპარავდნენ და ფარულად, უნებართვოდ გზავნიდნენ მომხმარებელთა ინფორმაციას.

ახალი ვიდეო მეტი ვიდეო

ყოფილი ცოლის ცემისთვის ბათუმში 29 წლის კაცი დააკავეს (ვიდეო)

კომენტარები