ერთიანი ნაციონალური მოძრაობის მაჟორიტარი დეპუტატობის კანდიდატების ნაწილი ცნობილია. ინფორმაცია რამდენიმე კანდიდატის შესახებ ყოფილმა პრემიერმინისტრმა, ვანო მერაბიშვილმა გამოაქვეყნა.
წყალტუბოს, სამტრედიის, ვანისა და ხონის ოლქში ენმ-ს მაჟორიტარი დეპუტატობის კანდიდატი გადამდგარი გენერალ-ლეიტენანტი, დევი ჭანკოტაძე იქნება.
საჩხერის, ჭიათურისა და ხარაგაულის ოლქში კანდიდატი ჟურნალისტი, Presa.ge-ის დირექტორი, გიორგი კაპანაძე იქნება.
ხოლო, ახალციხის, ადიგენის, ასპინძისა და ბორჯომის ოლქში პარტიას ვაჟა ჩიტაშვილი წარმოადგენს. ჩიტაშვილმა 2017 წელს ახალციხის მერობის კანდიდატად კენჭი ევროპული საქართველოდან იყარა. პარტია მან 2020 წლის 3 აგვისტოს დატოვა.
კანდიდატები ერთიან ნაციონალურ მოძრაობას ოფიციალურად ჯერ არ წარუდგენია.
ქართული ოცნებიდან დევი ჭანკოტაძის ოპონენტი იქნება გივი ჭიჭინაძე, ევროპული საქართველოდან – აკაკი ბობოხიძე. გიორგი კაპანაძის ოპონენტი ქართული ოცნებიდან იქნება პაატა კვიჟინაძე , ევროპული საქართველოდან კი – სერგო რატიანი. რაც შეეხება ვაჟა ჩიტაშვილს, მმართველი გუნდიდან მას ოპონირებას ანტონ ობოლაშვილი გაუწევს, ევროპულ საქართველოს ამ ოლქში კანდიდატი არ ჰყავს.