ბიოტექნოლოგიების კომპანია Moderna-მ კვლევის ახალი შედეგები გამოაქვეყნა. საბოლოო მონაცემების თანახმად, Moderna-ს ვაქცინა 94%-ით ეფექტიანია. ამ შედეგების საფუძველზე, Moderna გეგმავს, გამოითხოვოს გადაუდებელი გამოყენების უფლება აშშ-ს საკვებისა და მედიკამენტების ადმინისტრაციისგან.
30 000 ადამიანზე ჩატარებულმა საბოლოო კვლევამ გამოავლინა კორონავირუსის 185 შემთხვევა საკონტროლო ჯგუფში, რომელმაც პლაცებო მიიღო და 11 შემთხვევა ექსპერიმენტულ ჯგუფში, სადაც ცდისპირებმა აქტიური ვაქცინა მიიღეს.
Moderna-ს კვლევის შედეგები Pfizer-ის ვაქცინის კვლევების მსგავსია. Pfizer-მა გადაუდებელი გამოყენებისთვის ავტორიზაციაზე განაცხადი 9 ნოემბერს შეიტანა, რასაც FDA-ს მრჩეველთა კომიტეტი 10 დეკემბერს საჯაროდ განიხილავს. Moderna ელის, რომ FDA 17 დეკემბერს უკვე მზად იქნება საჯარო შეხვედრისთვის, სადაც ახალ მონაცემებს მიმოიხილავენ.
ორივე ვაქცინა მსგავს ტექნოლოგიას იყენებს. იმის ნაცვლად, რომ ადამიანებში შეიყვანონ მკვდარი ან დასუსტებული მიკროორგანიზმი, ახალი ვაქცინების პროდუქტები გენეტიკური მასალის მცირე ფრაგმენტებს წარმოადგენენ. როდესაც ეს ფრაგმენტები შეჰყავთ ადამიანის მხარში, მას იმუნური სისტემის უჯრედები ამოიცნობენ და გენეტიკური კოდის წაკითხვის შემდეგ წარმოქმნიან იმ ცილას, რომელიც კორონავირუსის საკვანძო კომპონენტია. შემდეგ სხეული წარმოქმნის ანტისხეულებს ამ ცილის წინააღმდეგ, ამგვარად ორგანიზმი ნამდვილ ვირუსთან ექსპოზიციისას წინასწარ მომზადებული იქნება, დაამარცხოს ვირუსი უკვე შემუშავებული ანტისხეულებით.
