ცნობილ რუს ბლოგერს ილია ვარლამოვს, გუშინ მოსკოვში გამართული ,,ქართველების აქციის’’ გაშუქება სთხოვეს, რის სანაცვლოდაც 2 ათას დოლარამდე თანხა შესთავაზეს. ამის შესახებ ინფორმაცია თავად ბლოგერმა გაავრცელა.
ილია ვარლამოვი საკუთარ ბლოგზე წერს, რომ ელექტრონულ ფოსტაზე შეტყობინება მიიღო ქალბატონისგან, რომელიც ორგანიზაცია ,,საქართველოს ხმა-სამართლიანი არჩევნებისთვის’’ წარმომადგენლად გაეცნო და 24 ივნისის აქციაში ფოტოჟურნალისტად მუშაობა შესთავაზა. ვარლამოვს გადაღებული ფოტომასალა და ინფორმაცია საკუთარ ბლოგზე უნდა გამოექვეყნებინა.
,,ვუთხარი, რომ თუ რაღაცისთვის ვიღებ ფულს, ამის შესახებ ყოველთვის ვწერ. პოსტის დასაწყისში იქნებოდა წარწერა , რომ ამ ღონისძიების გაშუქებისთვის თანხა გადამიხადეს. ამის შემდეგ ქალბატონი გაქრა.’’-წერს ბლოგზე ილია ვარლამოვი.
,,ქართველთა აქცია’’ საქართველოში სამართლიანი არჩევნების ჩატარების მოთხოვნით, მოსკოვში გუშინ გაიმართა.
რადიო Эхо Москвы-ს ბლოგერი და ფოტოგრაფი ზურაბ ჯავახაძე, საკუთარი ბლოგის საშუალებით იუწყება, რომ აქციის მონაწილეთა უმეტესობას შედგენდნენ არა ქართველები, არამედ სხვადასხვა წარმომავლობის ადამიანები, რომლებიც ფულის სანაცვლოდ ვლადიმირ პუტინის მხარდასაჭერ აქციებზეც დადიან. მათ შორის მიგრანტები ცენტრალური აზიიდან, ასევე პენსიონრები, უსახლკაროები და უსტიპენდიო სტუდენტები. აქციის დასრულების შემდეგ, მომიტინგეებმა ქართული დროშები და მაისურები ჩააბარეს და ფულის მისაღებად წავიდნენ.