NDI-ის კვლევის მიხედვით, მოსახლეობის 88% პატრიარქის საქმიანობას დადებითად აფასებს. პრემიერმინისტრ ბიძინა ივანიშვილის საქმიანობას დადებითად 69% მიიჩნევს. უარყოფითად პრემიერის საქმიანობას მოსახლეობის 3% თვლის, 12%-მა კი ივანიშვილის საქმიანობა ვერ შეაფასა. აგვისტოში ივანიშვილის საქმიანობას დადებითად 27% აფასებდა.
პარლამენტის თავმჯდომარის დავით უსუფაშვილის საქმიანობას დადებითად 38% აფასებს, საშუალოდ 29%, უარყოფითად კი 5%. 23%-მა უსუფაშვილის საქმიანობა ვერ შეაფასა.
ნაციონალური მოძრაობიდან ყველაზე დადებითად მოსახლეობა დავით ბაქრაძის საქმიანობას აფასებს. 21%-ს თვლის, რომ ბაქრაძის საქმიანობა პოზიტიურია. უარყოფითად მისი საქმიანობა მოსახლეობის 22%-მა მიიჩნია.
მიხეილ სააკაშვილის საქმიანობას დადებითად 16% აფასებს, უარყოფითად კი - 38%. აგვისტოში პრეზიდენტის საქმიანობას დადებითად 41% აფასებდა, უარყოფითად - 12%.
დაეცა თბილისის მერის, გიგი უგულავას საქმიანობის შეფასებაც. დადებითად მის საქმიანობას 14% აფასებს, უარყოფითად კი 40%. აგვისტოში მერის საქმიანობას დადებითად 39% მიიჩნევდა, უარყოფითად კი 9%.
ეროვნულ-დემოკრატიულმა ინსტიტუტმა საზოგადოებრივი აზრის კვლევის შედეგების მეორე ნაწილი 17 დეკემბერს წარმოადგინა. კვლევის საველე სამუშაოები, საქართველოს მასშტაბით, 14-25 ნოემბრის პერიოდში ჩატარდა და წარმომადგენლობითი შერჩევის საფუძველზე 1,947 პირისპირ ინტერვიუს ეფუძნება.
