ქუთაისის საქალაქო სასამართლოს გადაწყვეტილებით, გურამ ჩალაგაშვილი გამოძიების დასრულებამდე ენერგეტიკისა და წყალმომარაგების მარეგულირებელი ეროვნული კომისიის თავმჯდომარის თანამდებობაზე დარჩება. ამის შესახებ ინფორმაციას ჩალაგაშვილის ადვოკატი ავრცელებს.
ჩალაგაშვილი ძალაუფლების გადამეტების ბრალდებით დააკავეს. ბრალდების მხარის მტკიცებით, სემეკ-ის ხელმძღვანელმა ერთ-ერთ რესტორანში ყოფნისას თავის ქვეშევრდომებს დაავალა, წყალტუბოს რაიონში ელექტროენერგია 20 წუთით გაეთიშათ.
ჩალაგაშვილი ბრალდებულის სტატუსით შს სამინისტროს იმერეთის სამხარეო მთავარ სამმართველოში დაიკითხა. როგორც დაკითხვის შემდეგ მარეგულირებელი ეროვნული კომისიის თავმჯდომარემ ჟურნალისტებს განუცხადა, იგი ბრალდებას უსაფუძვლოდ მიიჩნევს.
ჩალაგაშვილის განცხადებით, იგი 12 იანვარს რესტორანში წვეულებაზე იმყოფებოდა და დამწვრის სუნი იგრძნო, რაც, სავარაუდოდ, გაუმართავი ელექტროსადენებით უნდა ყოფილიყო გამოწვეული. ჩალაგაშვილის თქმით, უსაფრთხოების მიზნით იგი შესაბამის უწყებებს დაუკავშირდა და შუქი გაათიშინა.