საქართველოს სტატისტიკის ეროვნულმა დეპარტამენტმა საქართველოს საგარეო ვაჭრობის 2012 წლის მონაცემები გამოაქვეყნა. მონაცემების მიხედვით, 2012 წელს წინა წელთან შედარებით საქართველოს საგარეო სავაჭრო ბრუნვა 11%-ით გაიზარდა და 10.2 მილიარდი აშშ დოლარი შეადგინა, უარყოფითი სავაჭრო ბალანსი 12.2%-ით გაიზარდა და 5.46 მილიარდი დოლარი შეადგინა.
2012 წელს წინა წელთან შედარებით 9%-ით გაიზარდა ექსპორტი (2.37 მილიარდი დოლარი შეადგინა), 11%-ით მოიმატა იმპორტმა (7.84 მილიარდი დოლარი).
საგარეო ვაჭრობაში 2012 წლის ბოლო კვარტალში წინა წლის ანალოგიურ მაჩვენებელთან შედარებით 2.8%-იანი კლება დაფიქსირდა. ექსპორტმა 2012 წლის ოქტომბერ-დეკემბერში 609 მილიონი დოლარი შეადგინა, რაც 4.5%-იანი კლებაა, მეოთხე კვარტალში 2.3%-ით შემცირდა იმპორტი. მეოთხე კვარტალში 1.3%-ით შემცირდა უარყოფითი სავაჭრო ბალანსი.
საქართველოს უმსხვილესი სავაჭრო პარტნიორი კვლავ თურქეთია - მასთან სავაჭრო ბრუნვამ გასულ წელს 1.53 მილიარდი დოლარი შეადგინა. შემდეგ მოდის აზერბაიჯანი (1.26 მილიარდი), უკრაინა (764.1 მილიონი).
მსუბუქი ავტომობილების რეექსპორტის 30.4%-ით გაიზარდა და საქართველოს მთლიანი ექსოპრტის 24.7% შეადგინა. შემდეგ მოდის ფეროშენადნობი 11%-იანი წილით მთლიან ექსპორტში, აზოტოვანი სასუქები (5.8%), ოქრო (3.7%), თხილი (3.5%). მთლიანი ექსპორტის 2.7% შეადგინა ღვინომ, რაც ყველაზე მაღალი მაჩვენებლია 2006 წელს რუსეთის მიერ დაწესებული ემბარგოს შემდეგ.
უმსხვილესი საიმპორტო სასაქონლო ჯგუფი 2012 წელს კვლავ ნავთობი და ნავთობპროდუქტები იყო (12.1% მთლიან იმპორტში), შემდეგ მოდის მსუბუქი ავტომობილები (8.5%), ნახშირწყალბადები (3.2%), ხორბალი (3.1%).