ახალგაზრდა იურისტთა ასოციაციის მხარდასაჭერად, ბათუმში აქციის გამართვა იგეგმება. აჭარის ფილიალის წარმომადგენლები დღეს, 15:00 საათზე ბრიფინგს გამართავენ, რის შემდეგაც აქცია გაიმართება. ამის შესახებ ინფორმაციას ნეტგაზეთი ავრცელებს.
როგორც ცნობილია, აქციაზე მისვლას სოციალურად დაუცველებიც გეგმავენ, რომლებიც უკვე ორი დღეა, აჭარის მთავრობის სახლთან აქციებს მართავენ.
გარდა ამისა, სააგენტო ინტერპრესნიუსის ცნობით, დღესვე საია-ს თავმჯდომარე კახა კოჟორიძე შინაგან საქმეთა მინისტრის მოადგილეს, ლევან იზორიას შეხვდება.
კოჟორიძის თქმით, ''მნიშვნელოვანია, როგორ იქცევა შსს, როცა საქმე ეხება მისი თანამშრომლის კანონდარღვევას''.
"მინდა, კიდევ ერთხელ აღვნიშნო, რომ საია ამ თემაზე აქცენტს აკეთებს არა იმიტომ, რომ ამბავი მის კონკრეტულ თანამშრომლებს ეხება, არამედ იმიტომ, რომ ბატონ თელიას ქმედებაში იყო კანონდარღვევები, ამ კანონდარღვევას შემდეგ უფრო მნიშვნელოვანი და სერიოზული დარღვევები მოჰყვა, რამაც წარმოაჩინა, რომ შსს-ს ადგილობრივი თანამშრომლები არათუ არ იძიებდა საქმეს, არამედ ცდილობდა, დაეფარა იქ მომხდარი ამბავი. ამას მოწმობს იგივე მტკიცებულების განადგურების ფაქტი. თუნდაც ის, რომ ერთ-ერთ ობიექტზე არსებობს ვიდეოჩანაწერი და არავინ მიდის მის ამოსაღებად. მხოლოდ გუშინ გაგზავნეს ის ადამიანი, რომელიც სხვა ობიექტზე იგივე მტკიცებულების განადგურებაში მონაწილეობდა", - განაცხადა კახა კოჟორიძემ.
შეგახსენებთ, 28 მარტს, ბათუმში, გრიბოედოვის ქუჩაზე საქართველოს ახალგაზრდა იურისტთა ასოციაციის თანამშრომლებსა და აჭარის შინაგან საქმეთა მთავარი სამმართველოს უფროსს, ვალერიან თელიას შორის ინციდენტი მოხდა. საია-ს თანამშრომლების თქმით, თელიამ მათ ფიზიკური და სიტყვიერი შეურაცხყოფა მიაყენა. საია-ს მძღოლი როინ ფარტენაძე აცხადებს, რომ პოლიციის უფროსმა მისი მანქანაში ჩატენა სცადა, რა დროსაც შეხლა-შემოხლის შედეგად პულოვერი გაეხა. ვალერიან თელია ფიზიკური შეურაცხყოფის ფაქტს უარყოფს.
საქართველოს ახალგაზრდა იურისტთა ასოციაცია აჭარის შს მთავარი სამმართველოს უფროსის, ვალერიან თელიასთვის უფლებამოსილების შეჩერებას ითხოვს.
აღნიშნულთან დაკავშირებით შინაგან საქმეთა სამინისტრომ გუშინ ინციდენტის ამსახველი ვიდეომასალა გამოაქვეყნა, რომელიც ადგილზე ახლომდებარე ერთ-ერთი ობიექტის სათვალთვალო კამერითაა გადაღებული.