საქართველოს სურსათის ეროვნული სააგენტოს ექვსკაციანი დელეგაცია რუსეთში გაემგზავრა. როგორც ჟურნალისტებს დელეგაციის ხელმძღვანელმა და სურსათის ეროვნული სააგენტოს უფროსმა ზურაბ ჩეკურაშვილმა განუცხადა, დელეგაცია 2 აპრილს როსსელხოზნადზორის ხელმძღვანელ სერგეი დანკვერკს შეხვდება.
ზურაბ ჩეკურაშვილის განმარტებით, შეხვედრის ძირითადი მიზანი, ქართული სასოფლო სამეურნეო პროდუქციის რუსეთის ბაზარზე ექსპორტია.
"ჩვენ გვინდა ჩვენი პროდუქცია დავაბრუნოთ ტრადიციულ ბაზარზე", - აცხადებს ჩეკურაშვილი.
დელეგაციის შემადგენლობაში შედიან სურსათის ეროვნული სააგენტოს უფროსის მოადგილე და საქართველოს მთავარი ვეტერინარი ექიმი მიხეილ სოხაძე, სურსათის უვნებლობის დეპარტამენტის უფროსი კახა სოხაძე და მისი მოადგილე დემნა ხელაია, ფიტო-სანიტარიის დეპარტამენტის უფროსი ზურაბ ლიპარტია და მცენარეთა კარანტინის სპეციალისტი ოთარ სხვიტარიძე.
ქართული დელეგაცია მოსკოვში ორ დღეს დაჰყოფს და ოთხ აპრილს საქართველოში დაბრუნდება.
