საქართველოს მთავრობის 7 მაისის განკარგულების თანახმად, რიჩარდ ლუგარის სახელობის საზოგადოებრივი ჯანდაცვის ცენტრი, რომელიც აშშ-ის დახმარებით შეიქმნა, ლიკვიდირებულად გამოცხადდა. ცენტრის ქონება დაავადებათა კონტროლის ეროვნული ცენტრს გადაეცა. ამ პროცესის განსახორციელებლად, განკარგულების თანახმად, სალიკვიდაციო კომისია უნდა შეიქმნას, რომელშიც რამდენიმე უწყების წარმომადგენლები შევლენ.
მთავრობის განკარგულების გამოქვეყნებამდე, ლუგარის სახელობის საზოგადოებრივი ჯანდაცვის ცენტრი 8 მაისს საქართველოს პრემიერმინისტრმა, ჯანდაცვის მინისტრმა და საქართველოში აშშ-ის ელჩმა მოინახულეს. ბიძინა ივანიშვილს მედიისთვის კომენტარი არ გაუკეთებია. ცენტრის ლიკვიდაციის შესახებ არაფერი უთქვამს ჯანდაცვის მინისტრ დავით სერგეენკოს, რომელმაც მხოლოდ ის განაცხადა, რომ ლუგარის სახელობის ცენტრში უნიკალური სამეცნიერო ბაზა და ინფრასტრუქტურა შეიქმნა და ცენტრის მუშაობაში "ახალი ეტაპი" იწყება.
დავადებათა კონტროლის ცენტრის ხელმძღვანელმა (რომლის განკარგულებაშიც ლუგარის სახელობის ცენტრის ქონება გადავა) ამირან გამყრელიძემ აღნიშნა, რომ მალე ლუგარის ცენტრის შენობაში დაავადებათა კონტროლის ცენტრის ლაბორატორია უნდა გადავიდეს,
სპეციალისტებთან ერთად. აშშ-ის ელჩმა რიჩარდ ნორლამდმა კი ხაზი გაუსვა შეერთებული შტატების წვლილს ცენტრის შექმნის საქმეში და აღნიშნა, რომ ის "უახლესი ტექნოლოგიებით აღჭურვილი დაწესებულებაა და მოწოდებულია, მოიზიდოს ექსპერტები სხვადასხვა სფეროდან და ჩატარდეს მაღალი დონის კვლევები". ნორლანდის თქმით, ცენტრს რეგიონში ანალოგი არ აქვს.
გადაწყვეტილება საქართველოში "ცენტრალური რეფერალური ლაბორატორიის" შექმნის შესახებ 2004 წელს, სენატორ რიჩარდ ლუგარის ვიზიტის დროს იქნა მიღებული. ცენტრმა საქმიანობა ოფიციალურად 2011 წლიდან დაიწყო. რიჩარდ ნორლანდის თქმით, შეერთებულმა შტატებმა ამ პროექტში 150 მილიონი დოლარის ინვესტირება განახორციელა. ის ბიოუსაფრთხოების დარგში რეგიონში ყველზე უკეთ აღჭურვილ კვლევით ცენტრს წარმოადგენდა. მისი ამოცანა ბიოლოგიური საფრთხეების კვლევა და მათზე დროული რეაგირება იყო.
აღსანიშნავია, რომ საქართველოში აშშ-ის მიერ დაფინანსებული ბიოუსაფრთხოების ლაბორატორიის გახსნა აქამდე არაერთხელ გახდა სპეკულაციის თემა როგორც რუსულ პრესაში, ასევე ცხინვალის რეჟიმის მხრიდან. რუსეთის მთავარმა სანიტარმა გენადი ონიშენკომ 2011 წელს საქართველო ღორის ჭირის გავრცელებაში დაადანაშაულა და აღნიშნა, რომ დაავადება რუსეთში "საიდუმლო ლაბორატორიიდან" მოხვდა. გასულ თვეში გაზეთ ყველა სიახლისთვის მიცემულ ინტერვიუში აშშ-ის მოქალაქე ჯეფრი სილვერმანმა, რომელმაც საკუთარი თავი "საქართველოს პრეზიდენტის ყოფილ მრჩევლად" წარადგინა, განაცხადა, რომ „ თბილისში მდებარე ლაბორატორიაში ჯილეხის, ციმბირის წყლულის, შავი ჭირის და H1N1-ის ბაქტერიებს ამზადებენ" და მრავალი ეპიდემია, მათ შორის წითელა, ხელოვნურად იყო გამოწვეული. ეს ბრალდებები როგორც აშშ-ის ელჩმა საქართველოში, ასევე საქართველოს ჯანდაცვის მინისტრმა კატეგორიულად უარყვეს.
