ადვოკატი: უგულავას გამგზავრების შესახებ შეტყობინების ვალდებულება არ აქვს

ერთიანი ნაციონალური მოძრაობის საარჩევნო შტაბის ხელმძღვანელის გიგი უგულავას ადვოკატის ბექა ბასილაიას განმარტებით, მისი დაცვის ქვეშ მყოფი "ვალდებული არ იყო, ქვეყნის დატოვების შესახებ ინფორმაცია სამართალდამცავებისთვის და სასამართლოსთვის მიეწოდებინა, რადგან მას აღკვეთის ღონისძიებად გირაო აქვს შეფარდებული".

თუმცა, როგორც ადვოკატმა ტაბულას უთხრა, ამის მიუხედავად,  გიგი უგულავა უცხოეთში გამგზავრების წინ სამართალდამცველებსა და სასამართლოს ინფორმაციას თავისი ნებით აწვდიდა და ახლაც მიაწოდა. 

ფინანსთა სამინისტროს საგამოძიებო სამსახურის პრესსამსახურის უფროსის გიორგი გრძელიშვილის განცხადებით კი, გიგი უგულავა საგამოძიებო მოქმედებებისთვის თავის არიდებას აპირებდა. როგორც გრძელიშვილმა დღევანდელ ბრიფინგზე თქვა, ენმ-ის საარჩევნო შტაბის ხელმძღვანელი ისე აპირებდა ქვეყნიდან გასვლას, რომ სასამართლო და საგამოძიებო ორგანო არ გააფრთხილა.

"ის აღკვეთის ქვეშ არის სხვა საქმეზე. ამის მიუხედავად, აპირებდა საზღვარგარეთ წასვლას ისე, რომ არ გააფრთხილა არც სასამართლო და არც საგამოძიებო ორგანო. გვაქვს ოპერატიული ინფორმაცია, რომ ის საგამოძიებო მოქმედებებისთვის თავის არიდებას აპირებდა", - თქვა გრძელიშვილმა და აღნიშნა, რომ წინასაარჩევნო მორატორიუმთან დაკავშირებული განცხადებებით, უგულავა თემის გადაფარვას ცდილობს.

"თბილისის მერმა გიგი უგულავამ ცენტრალური ბიუჯეტის განზრახ იგნორირებით კანონთან შეუსაბამო ბრძანების საფუძველზე სიტი პარკისთვის დამატებითი შეღავათების დაწესებით კომპანიის სასარგებლოდ მთლიანობაში გაფლანგა სახელმწიფოს კუთვნილი დიდი ოდენობით თანხა 1 086 718 ლარი. საქმეზე გრძელდება სისხლის სამართლის კოდექსის 182-ე მუხლის მეორე და მესამე ნაწილებით, რაც სასჯელის სახედ და ზომად ითვალისწინებს თავისუფლების აღკვეთას 7-დან 11 წლამდე ვადით", - აცხადებს ფინანსთა სამინისტროს საგამოძიებო სამსახური და აღნიშნავს, რომ აღკვეთის ღონისძიების შეფარდების საკითხზე სასამართლოსადმი მიმართვის გადაწყვეტილებას პროკურატურა მიიღებს.