კახეთში სეტყვისგან მოყენებულ ზარალი მხოლოდ იმ მოქალაქეებს აუნაზღაურდებათ, ვისაც მოსავალი დაზღვეული ჰქონდა, ამის შესახებ სოფლის მეურნეობის მინისტრმა ოთარ დანელიამ ტელეკომპანია რუსთავი 2-ის ეთერში განაცხადა. მისი თქმთ, მთავრობა ყველაფერს გააკეთებს, რათა სტიქიით დაზარალებულებმა შესაბამისი დახმარება მიიღონ.
„ჩვენ გავაკეთებთ მაქსიმუმს. ჩვენ მივიღეთ გადაწყვეტილება, რომ დამატებით წავახალისოთ დაზღვევა და სახელმწიფომ გაზარდოს 50-70 პროცენტამდე დაზღვევის თანადაფინანსების კომპონენტი," - განაცხადა ოთარ დანელიამ. მათ კი, ვისაც აგროდაზღვევა არ აქვს, ხელისუფლება შხამ-ქიმიკატებით დაეხმარება.
დანელიას თქმით, სეტყვასაწინააღმდეგო სისტემა, რომლის შექმნაზეც 14 მილიონი ლარი დაიხარჯა, 80-90 პროცენტით ეფექტური გამოდგა. "კახეთში უნდა ყოფილიყო წელს მინიმუმ 34 სეტყვის შემთხვევა და იყო მხოლოდ სამი... ეს არის მისაღები შედეგი", - განაცხადა დანელიამ.
სტიქიის შედეგების აღმოფხვრის საკითხები მთავრობის ეკონომიკურმა გუნდმა პრემიერმინისტრთან შეხვედრაზე განიხილა.