გარემოს დაცვის სამინისტროს ცნობით, ქარის გამო, დუშეთის მუნიციპალიტეტის სოფელ ზემო თვალივის მიმდებარე ტერიტორიაზე ხანძრის სალიკვიდაციო სამუშაოები გაძნელებულია. ადგილზე მუშაობს სატყეო სააგენტოს 50 თანამშრომელი და 12 მეხანძრე-მაშველი.
ხანძარი დუშეთში გუშინ გაჩნდა. ცეცხლი ხმელ ფოთოლსა და ბალახს მოედო, ნაწილობრივ ხე-მცენარეებზეც გადავიდა.
"ღამითვე მოხერხდა ხანძრის ლოკალიზება, დამწვარია დაახლოებით 4 ჰექტრამდე ფართობი. სალიკვიდაციო სამუშაოებში კერძო კომპანიის ვერტმფრენი ჩაერთო. ასევე, სამაშველო სამსახურთან ერთად, ჩართულები არიან მცხეთა-მთიანეთის სატყეო სამსახურის 45 თანამშრომელი, მცხეთა-მთიანეთის გუბერნატორის ადმინისტრაცია, ადგილობრივი გამგეობისა და პოლიციის თანამშრომლები.
ძლიერი ქარის გამო ხანძრის სრული სალიკვიდაციო სამუშაოები გაძნელებულია" - აცხადებს გარემოს დაცვის სამინისტრო.
