ზურა ჯაფარიძე გაათავისუფლეს. ის რამდენიმე საათის განმავლობაში პოლიციის მთავარ სამმართველოში იკითხებოდა.
როგორც გათავისუფლების შემდეგ მან თქვა, პოლიციელებმა მას აუხსნეს, რომ დაკავებული არ არის და პოლიციაში გამოკითხვისთვის მიიყვანეს.
"მითხრეს, რომ დაკავებული არ ვარ და მოყვანილი ვიყავი გამოკითხვაზე. ჩაატარეს ჩემი პირადი ჩხრეკა, ძალიან სკუპრულოზურად და დეტალურად, ტანსაცმლის ყველა კყთხე-კუნჭული, ფეხსაცმელი და წინდებიც კი. ვუთხარი, რომ არაფერი მქონდა და რაც მქონდა, ყველაფერი იქ დავარიგე. ამის შემდეგ იყო გამოკითხვა, საკმაოდ ვრცელი, რამდენიმე გვერდიანი. სისხლის სამართლის საქმე აქვთ დაწყებული და ამის ფარგლებში გამომკითხეს ყველაფერი, როგორ დავაორგანიზეთ, რას ვაპირებდი, რა გავაკეთე, ჯოინთი რას ნიშნავს და ა.შ საბოლოოდ, დასრულდა ეს გამოკითხვა ისე, რომ მითხრეს, რომ სისხლის სამართლის საქმე დაწყებულია, გაგრძელდება და დღე დასრულდა ამით", - თქვა ჯაფარიძემ.
სამართალდამცველებმა "გირჩის" საპრეზიდენტო კანდიდატი, ზურა ჯაფარიძე მაშინ დააკავეს, როდესაც მან დედა ენის ბაღში, "კანაფის ლეგალიზაციის ფესტივალზე" მისულებს მარიხუანა დაურიგა.
კანაფის ლეგალიზაციის ფესტივალი, რომელიც სწორედ დედა ენის ბაღში უნდა გამართულიყო, არ შედგა, მას ხელი პოლიციამ შეუშალა. ჯაფარიძესთან ერთად დააკავეს 11 ადამიანი.
შსს-მ გამოძიება გირჩის მიერ მარიხუანას ე.წ. ფესტივალის ორგანიზების და ფესტივალის ფარგლებში მარიხუანას უკანონოდ შეძენა-შენახვა-გასაღების ფაქტზე შინაგან საქმეთა სამინისტროს ცენტრალური კრიმინალური პოლიციის დეპარტამენტში 13 ოქტომბერს დაიწყო, სსკ-ის 273-ე პრიმა მუხლის მე-2 და მე-8 ნაწილებით.
(მცენარე კანაფის ან მარიხუანის უკანონო შეძენა, შენახვა, გადაზიდვა, გადაგზავნა, გასაღება ან/და ექიმის დანიშნულების გარეშე მოხმარება.
მე-2 ნაწილი - მცენარე კანაფის ან მარიხუანის უკანონო შეძენა, შენახვა, გადაზიდვა, გადაგზავნა, გასაღება ან/და ექიმის დანიშნულების გარეშე მოხმარება
მე-8 ნაწილი - მცენარე კანაფის ან მარიხუანის უკანონო გასაღება. ისჯება თავისუფლების აღკვეთით ვადით სამიდან რვა წლამდე).
შსს აცხადებს, რომ "ამ გამოძიების ფარგლებში ზურაბ ჯაფარიძის მიმართ აუცილებელი გახდა საგამოძიებო მოქმედებების ჩატარება, რაც შეკრებილი ხალხის რაოდენობის გათვალისწინებით, ადგილზე შეუძლებელი იყო. ვინაიდან ზურაბ ჯაფარიძე პრეზიდენტობის კანდიდატია, სამართალდამცველებმა მას შესთავაზეს საგამოძიებო
მოქმედებებში მონაწილეობის მისაღებად პოლიციის განყოფილებაში გაყოლა. ზურაბ ჯაფარიძე პოლიციის თანამშრომლებს გაჰყვა ნებაყოფლობით".
საქართველოს საკონსტიტუციო სასამართლოს 30 ივლისის გადაწყვეტილებით, მარიხუანას მოხმარება ლეგალური გახდა.
