პირველი საუნივერსიტეტო კლინიკის დირექტორის, ლევან რატიანის თქმით, ამ ეტაპზე კლინიკაში კორონავირუსით ინფიცირებული 88 პაციენტი რჩება.
რატიანის ინფორმაციით, ხვალ, სავარაუდოდ, 15 პაციენტი დატოვებს კლინიკას.
მისივე თქმით, ამ ეტაპზე კლინიკაში 9 მძიმე პაციენტია, 6 მართვით სუნთქვაზეა, 3-ის მდგომარეობა კი კრიტიკულად მძიმეა.
"ამ ეტაპზე კლინიკაში გვყავს 99 პაციენტი, აქედან 88 არის ინფიცირებული. ერთ პაციენტთან მოგვივიდა უარყოფითი პასუხი და ეწერება კლინიკიდან. რეანიმაციულ განყოფილებაში გვყავს 9 პაციენტი, აქედან 6 მართვით სუნთქვაზეა. 3 კრიტიკული პაციენტის მდგომარეობა მძიმეა.
დანარჩენი პაციენტების შემთხვევაში დაახლოებით 15-თან დაფიქსირდა დადებითი პასუხი და გაგზავნილია ლუგარის ლაბორატორიაში, ნაცხის პასუხს ველოდებით და სავარაუდოდ, ხვალ დატოვებენ კლინიკას.
რაც შეეხება 3 მოზარდს, მათ არ აქვთ არანაირი კლინიკური გამოვლინება. სტაბილურია ასევე ჩვენს კლინიკაში მყოფი ინფიცირებული მედიკოსების მდგომარეობაც. პაციენტები, რომლებიც გუშინ მივიღეთ, ერთ მათგანთან გამოვლინდა მწვავე პნევმონია და მკურნალობს სიმპტომურად," - თქვა რატიანმა.
მთელი საქართველოს მასშტაბით, 18 აპრილის 11:00 საათის მონაცემებით, ახალი კორონავირუსი 385 ადამიანს დაუდასტურდა, მათგან 84 გამოჯანმრთელდა, გარდაიცვალა 3 ადამიანი.
