ერთიანი ნაციონალური მოძრაობის ერთ-ერთი ლიდერი ხატია დეკანოიძე იუსტიციის მინისტრთან, რატი ბრეგაძესთან შეხვედრას ითხოვს. მოთხოვნის შესახებ დეკანოიძემ იუსტიციის სახლთან გამართულ, მიხეილ სააკაშვილის მხარდამჭერ აქციაზე ისაუბრა.
"მე ფრაქცია ერთიანი ნაციონალური მოძრაობის - ძალა ერთობაშიას სახელით, ჩვენი საპარლამენტო დეპუტაციის სახელით ვითხოვ, საქართველოს კანონმდებლობით მინიჭებულ შეხვედრის უფლებას და შეხვედრას, საქართველოს იუსტიციის მინისტრთან." – თქვა დეკანოიძემ.
ოპოზიციონერი პოლიტიკოსი იუსტიციის მინისტრისგან მიხეილ სააკაშვილის მიმართ სახელმწიფოს მოქმედებების განმარტებას ითხოვს.
"შეხვედრის დროს [იუსტიციის მინისტრმა] მოჰყვეს არგუმენტები, რატომ ხდება, რომ საქართველოს იუსტიციის სამინისტრო, საქართველოს ხელისუფლება, არღვევს საერთაშორისო კონვენციებით გათვალისწინებულ ყველანაირ მუხლს, რატომ ხდება რომ საქართველოს იუსტიციის სამინისტრომ მიიღო გადაწყვეტილება, ყოველგვარი კანონის და კონსტიტუციის დარღვევით მოეტაცებინა საქართველოს მესამე პრეზიდენტი, პატიმარი, რომლის მიმართაც განხორციელდა მათ შორის წამების და არაადამიანური მოპყრობის ფაქტები." – თქვა დეკანოიძემ.
პოლიტიკოსმა მიხეილ სააკაშვილის გლდანის N18 მსჯავრდებულთა საავადმყოფოში გადაყვანას, ისე რომ ამის შესახებ ინფორმაცია არ გავრცელებულა, რეჟიმის ქცევის "საბოლოო ზღვარი" უწოდა.
"ის რაც მოხდა გუშინ საქართველოში იყო პრაქტიკულად საბოლოო ზღვარი, როგორც იქცევა რეჟიმი, როგორც იქცევა კლეპტოკრატია, ოლიგარქია, როდესაც პრეზიდენტს იტაცებენ, შემდეგ მიჰყავთ გლდანის სასჯელაღსრულების სამედიცინო ცენტრში ისე რომ ჩვენ საათნახევარი ვეძებდით და ვერ ვიპოვეთ. ვერავინ ვერ მიაკვლია, სახალხო დამცველმაც ვერ მიაკვლია. ამის შემდეგ, მიდიან, აწყობენ ხმაურს, ჩვენ ვხედავდით ამაზრზენ კადრებს, როგორ აგინებდნენ და ემუქრებოდნენ საქართველოს მესამე პრეზიდენტს და როგორ ჩამოშალეს ყველანაირი სახელმწიფოებრივი ზღვარი. ვხედავდით მორჩილ პოლიციას, რომელიც წინ ედგა და მორჩილებით უსმენდა კრიმინალების გინებას და მუქარას." – თქვა დეკანოიძემ.