2 000 000 ლარზე მეტის ჯარიმები საწვავის ნორმების დარღვევისთვის – გარემოსდაცვითი დეპარტამენტი

ჯამში 2 000 000 ლარზე მეტი ოდენობის ჯარიმები გამოიწერა საწვავში კანონმდებლობით დადგენილი ნორმების დარღვევისთვის - ამის შესახებ გარემოსდაცვითი ზედამხედველობის დეპარტამენტის განცხადებაშია ნათქვამი. 

"ქვეყნის მასშტაბით, 100 ავტოგასამართი სადგურიდან აღებულია დიზელის საწვავის 80 და საავტომობილო ბენზინის 20 ერთეული სინჯი.

ლაბორატორიული კვლევის შედეგად, დარღვევა გამოვლინდა 28 სინჯში. საწვავის ხარისხი კანონმდებლობით დადგენილ ნორმებს არ აკმაყოფილებდა დიზელის საწვავის 25 და ბენზინის 3 სინჯში. მათგან 12 ნიმუშში დარღვეული იყო გოგირდის შემცველობა, 10 სინჯში დაფიქსირდა დახურულ ტიგელში აფეთქების ტემპერატურის დადგენილ ნორმასთან შეუსაბამობა. რიგ შემთხვევაში, ერთდროულად იყო დარღვეული რამდენიმე პარამეტრი.

გარემოსდაცვითი ზედამხედველობის დეპარტამენტის თანამშრომლებმა სამართალდამრღვევების მიმართ ადმინისტრაციული სამართალდარღვევის შესაბამისი ოქმები შეადგინეს. ჯარიმების ოდენობა, ჯამში, 2 მილიონ ლარზე მეტია. საქმის მასალები, შემდგომი განხილვის მიზნით, შესაბამის სასამართლოებში გადაიგზავნა" - წერია გარმოსდაცვითი დეპარტამენტის განცხადებაში.