გირჩის ინიციატივა

ქანთარია გირჩის ინიციატივაზე: ძალიან ღრმად შევიდნენ, ალბათ, დასვენება სჭირდებათ

0 კომენტარი
ალექსანდრე ქანთარია ფოტო: საქართველოს პარლამენტი

"მარიხუანას მოსავალი მოიმკეს უკვე? რა ვიცი, მე მგონი, ძალიან ღრმად შევიდნენ უკვე და, ალბათ, დასვენება სჭირდებათ,"- განაცხადა ქართული ოცნების დეპუტატმა, ალექსანდრე ქანთარიამ, გირჩის ახალ ინიციატივაზე, რომელიც წვევამდელებს დაეხმარებათ, სავალდებულო სამხედრო სამსახურში გაწვევა გადაივადონ. 

პარტია "გირჩმა" რელიგიური ორგანიზაცია დააფუძნა, რომელიც სასულიერო პირებს აკურთხებს და შესაბამის ცნობებსაც გასცემს. სასულიერო წოდების მქონე ახალგაზრდებს კი კანონში არსებული ჩანაწერის საფუძველზე ჯარში გაწვევისგან გათავისუფლება შეუძლიათ. 

სამხედრო ვალდებულებისა და სამხედრო სამსახურის შესახებ საქართველოს კანონის 30-ე "ლ" ქვეპუნქტის მიხედვით, მოქალაქეს სავალდებულო სამხედრო სამსახურში გაწვევა გადაუვადდება, თუკი ის სასულიერო პირია. 

"გირჩის" წევრებმა ორგანიზაცია, სახელწოდებით "საქართველოს ქრისტიანული, ევანგელისტური, პროტესტანტული ეკლესია - ბიბლიური თავისუფლება", 2017 წლის მარტში დაარეგისტრირეს. ორგანიზაციის ხელმძღვანელი და მთავარი მღვდელმსახური ნიკა ობოლაძეა. 

პარტია წვევამდელებს სთავაზობს გაერთიანდნენ მათ მიერ დაარსებულ რელიგიურ ორგანიზაციაში, მიიღონ შესაბამისი ცნობა და ამ გზით აარიდონ თავი სავალდებულო სამხედრო სამსახურს.

როგორც პარტიის წევრები ამბობენ, თვეების განმავლობაში მათ უამრავი წვევამდელი მიმართავდა დახმარების მოთხოვნით, რის შემდეგაც მათ ეს გადაწყვეტილება მიიღეს. 
 

ახალი ვიდეო მეტი ვიდეო

შსს: დავაკავეთ ბიზნესპარტნიორები, რომლებმაც დავის გადასაწყვეტად კანონიერ ქურდებს მიმართეს

კომენტარები