დონალდ ტრამპის და ვლადიმერ პუტინის პირისპირ შეხვედრა ჰელსინკიში, რომელსაც მხოლოდ მათი თარჯიმნები ესწრებოდნენ, 2 საათზე მეტ ხანს გაგრძელდა.
თეთრი სახლის რეპორტიორი, ანი კარნი ამბობს, რომ შეხვედრის დასრულების შემდეგ ტრამპმა პუტინთან აუდიენციას "ყველასთვის ძალიან კარგი დასაწყისი უწოდა".
ახლა პრეზიდენტები ერთმანეთს გაფართოებულ ფორმატში, ოფიციალურ ვახშამზე ხვდებიან. მას აშშ-ის მხრიდან აშშ-ის ელჩ რუსეთში ჯონ ჰანთსმენი, აშშ-ის სახელმწფო მდივანი მაიკ პომპეო, თეთრი სახლის ადმინისტრაციის ხელმძღვანელი, ჯონ კელი, ეროვნული უსაფრთხოების მრჩეველი, ჯობ ბოლტონი და რუსეთის საკითებში ტრამპის მრცეველი, ფიონა ჰილი ესწრებიან.
რუსეთის 6 ადამიანისგან შემდგარ დელეგაციაში კი რუსეთის საგარეო საქმეთა მინისტრი, სერგეი ლავროვი და პუტინის პრესსპიკერი დმიტრი პესკოვი არიან.
რეპორტიორის ცნობით, რუსეთის და აშშ-ის დელეგაციის წევრები მაგიდასთან დასხდნენ, რომელსაც თეთრი სუფრა აქვს გადაფარებული და ღვინის ჭიქები და ფაიფურის ჭურჭელი აწყვია.
"როდესაც ჟურნალისტები შევედით, არც ერთი მათგანი ხმას არ იღებდა. პუტინი ზუსტად ტრამპის პირისპირ ზის. ტრამპის გვერდით, ერთ მხარეს მაიკ პომპეო, მეორე მხარს კი მისი თარჯიმანი სხედან", - წერს თეთრი სახლის რეპორტიორი.
პირისპირ შეხვედრის დაწყებამდე დონალდ ტრამპმა და ვლადიმირ პუტინმა კამერების წინ ერთმანეთს ხელი ჩამოართვეს, თუმცა ეს მხოლოდ 3 წამის განმავლობაში გაგრძელდა.
ტრამპმა თქვა, რომ ის პუტინთან ვაჭრობის, იარაღის, რაკეტების და ჩინეთის საკითხის განხილვას აპირებს. მედიასთან აშშ-ის პრეზიდენტს არ უხსენებია 2016 წლის საპრეზიდენტო არჩევნები და მასში რუსეთის სავარაუდო ჩარევა, უკრაინა, სირია, NATO და სკრიპალების საქმე. თუმცა, სამიტამდე ითქვა, რომ პრეზიდენტები სწორედ ამ საკითხებს განიხილავდნენ.
ტრამპმა პუტინს მსოფლიო საფეხბურთო ჩემპიონატის წარმატებულად ჩატარება მიულოცა.
"პირველ რიგში, ბატონო პრეზიდენტი, მე მსურს მოგილოცოთ მსოფლიო ჩემპიონატის დიდებულად ჩატარება. როგორც მეუბნებიან, ეს ერთ-ერთი საუკეთესო ჩემპიონატი იყო და ასევე, თქვენმა გუნდმა ამას თავი კარგად გაართვა.
რუსეთთან ურთიერთობის დალაგება კარგი რამეა. მრავალი წელი ჩვენ ერთმანეთს ვერ ვეწყობოდით. ვფიქრობ, რომ მსოფლიოს სურს, დავლაგდეთ. ჩვენ ორი დიდი ბირთვული ძალა ვართ", - თქვა აშშ-ის პრეზიდენტმა.
შეხვედრაზე ორივე ქვეყნის პრეზიდენტმა დააგვიანა, რაც როგორც მედიამ, ასევე სპეციალისტებმა დიპლომატიურ თამაშად აღიქვეს. პუტინის თვითმფრინავი ფინეთის დედაქალაქში ერთი საათით გვიან ჩაფრინდა იმ დროიდან, რა დროსაც წესით შეხვედრა უნდა დაწყებულიყო. ტრამპი კი გვიან მივიდა პრეზიდენტის სასახლეში, სადაც შეხვედრა იმართება.
სამიტის დაწყებამდე ტრამპმა ტვიტერზე დაწერა;
"ჩვენი ურთიერთობები რუსეთთან არასდროს ყოფილა უარესი ბევრი ამერიკელი პოლიტიკოსის სისულელის და სიბრიყვის წყალობით. მათ პასუხი მოეთხოვებათ".
კიდევ ერთი ტვიტით კი აშშ-ის პრეზიდენტმა თქვა:
"ჩვენ ნამდვილად დიდებული სამიტი გვქონდა, რაც მედიამ ვრცლად გააშუქა. NATO ახლა ძლიერი და მდიდარია".
