ეროვნულ-დემოკრატიული ინდტიტუტის (NDI) მიერ გამოქვეყნებული ახალი კვლევის მიხედვით, ქვეყანაში ინტერნეტის მომხმარებელთა რაოდენობა იზრდება.
ახალი ანგარიშის მიხედვით, ქვეყნის მასშტაბით, მოსახლეობის 54% ინტერნეტს ყოველდღიურად მოიხმარს, ხოლო 64%-ს კი კვირაში ერთხელ მაინც აქვს შეხება ინტერნეტთან.
თუ ამ შედეგებს 2018 წლის იანვარში გამოქვეყნებულ მაჩვენებელს შევადარებთ, დავინახავთ რომ მათი რაოდენობა, ვინც ინტერნეტს კვირაში ერთხელ მოიხმარს 62%-დან 64%-მდე გაიზარდა.
32%-დან 28%-მდე შემცირდა მოსახლეობის ის წილი, ვინც ინტერნეტს საერთოდ არ იყენებდა.
ინტერნეტის მოხმარება ქალაქი/სოფლის ჭრილში მეტად განსხვავებულია. დიდ ქალაქებში ინტერნეტს კვირაში ერთხელ მაინც მოიხმარს მოსახლეობის 77%, ხოლო სოფლად ეს რიცხვი 49%-ზეა.
NDI-ს კვლევის საველე სამუშაოები ჩატარდა 23 ივნისი-8 ივლისის პერიოდში, საქართველოს მასშტაბით (ოკუპირებული ტერიტორიების გამოკლებით) 2,409 პირისპირ ინტერვიუს წარმომადგელობითი შერჩევის საფუძველზე. საშუალო ცდომილების ზღვარი 1.9%-ია.
NDI-ის კვლევები ხორციელდება დიდი ბრიტანეთის მთავრობის UK aid-ის ფინანსური ხელშეწყობით. გამოკითხვას ატარებს CRRC-საქართველო.
ინტერნეტის გავრცელების მაღალ ტემპებს კომუნიკაციების ეროვნული კომისიის ანგარიშიც ადასტურებს. 2017 წლის მდგომარეობით, მოსახლეობის 77%-ს აქვს წვდომა მობილურ ინტერნეტთან.
შენიშვა: წვდომის არსებობა და ინტერნეტის მოხმარება განსხვავებული ცნებებია, შესაძლოა ადამიანს ჰქონდეს ინტერნეტთან წვდომა, მაგრამ მას ხშირად არ მოიხმარდეს.
