ვენესუელის ნაციონალური ასამბლეის ლიდერმა, ხუან გუაიდომ თავი ქვეყნის პრეზიდენტად გამოაცხადა.
კარაკასის ცენტრში შეკრებილ მრავალათასიან აქციაზე ხუან გუაიდო მომიტინგეებს დაპირდა, რომ ქვეყანაში გარდამავალ მთავრობას ჩამოაყალიბებს და გამჭვირვალე, სამართლიან არჩევნებს ჩაატარებს.
ხუან გუაიდოს მხარს უჭერს აშშ-ს პრეზიდენტი დონალდ ტრამპი. მისი თქმით, გუადიო ქვეყნის ოფიციალური და ლეგიტიმური მმართველია.
13 იანვარს, ბრაზილიის მთავრობამ გაავრცელა განცხადება, რომლის მიხედვითაც ისინი ვენესუელის პრეზიდენტად ნიკოლას მადუროს ნაცვლად ოპოზიციის ლიდერს, ხუან გუაიდოს ცნობენ
ბოლო რადენიმე დღეა ვენესუელაში ფართომასშტაბიანი აქციები მიმდინარეობს. მოსახლეობა ნიკოლას მადუროს გადაყენებას ითხოვს. უფლებადამცველები ამბობენ, რომ აქციების დროს 13 ადამიანი მოკლეს.
ასევე, ნიკოლას მადურომ აშშ-ს სახელმწიფო გადატრიალების მცდელობაში დაადანაშაულა და ამერიკელ დიპლომატებს ქვეყნის დასატოვებლად 72 საათი მისცა.
შეგახსენებთ, რომ გასული წლის მაისში ნიკოლას მადურომ ვენესუელას ვადამდელ საპრეზიდენტო არჩევნებში ხმათა 67,7% დააგროვა და ქვეყნის პრეზიდენტი მეორე ვადით გახდა. მიმდინარე კვირას მის ინაუგურაციას ოკუპირებული აფხაზეთის და ე.წ. სამხრეთ ოსეთის დე ფაქტო პრეზიდენტები, რაულ ხაჯიმბა და ანატოლი ბიბილოვიც დაესწრნენ.
თუმცა, არჩევნებში მონაწილეობა ამომრჩეველთა მხოლოდ 46%-მა მიიღო, ხოლო ოპოზიცია მადუროს არჩევნების გაყალბებაში და ამომრჩევლის მოსყიდვაში ადანაშაულებს. მათმა ნაწილმა არჩევნებს ბოიკოტი გამოუცხადა.
2017 წლის ბოლოს ვენესუელური ბოლივარის ინფლაციამ 440,000%-ს გადააჭარბა. ასეთივე ტემპით ეცემა ვენესუელური ბოლივარის გაცვლითი კურსი შავ ბაზარზე. ეკონომიკური კრიზისის გამო საშუალო ხელფასის ღირებულება $4-ს გაუტოლდა.
დოლარის ყიდვა ვენესუელაში მხოლოდ შავ ბაზარზეა შესაძლებელი, რადგან მთავრობამ რამდენიმე წლის წინ თავისუფალი სავალუტო ოპერაციები აკრძალა.
პრეზიდენტმა ნიკოლას მადურომ მოსახლეობას კურდღლების ყოლისკენაც კი მოუწოდა, რადგანაც, "კურდღლები კურდღლებივით მრავლდებიან", მათი ხორცის მიღება კი იაფი ჯდება. სახელმწიფომ მოსახლეობას "საჯიშე" კურდღლები უსასყიდლოდ გადასცა.
ვენესუელის მთავრობა ეკონომიკურ კრიზისს და საკვებისა თუ მედიკამენტების ნაკლებობას "ეკონომიკურ ომს" აბრალებს, რომელსაც მათი თქმით "იმპერიალისტური ძალები" ეწევიან.
მოსახლეობის განსაკუთრებული პროტესტი ნიკოლას მადუროს მიერ პარლამენტისთვის უფლებების ჩამორთმევას და მთავრობის მხარდამჭერებით დაკომპლექტებული "საკონსტიტუციო ასამბლეის" დაფუძნებისთვის გამართულ არჩევნებს მოჰყვა.
სახელმწიფომ პროტესტის ჩასახშობად სამხედროებიც გამოიყენა, გავრცელებული ინფორმაციით, საპროტესტო აქციებს 164 ადამიანი ემსხვერპლა 15,000 კი დაშავდა.
გაეროს ინფორმაციით 2015 წელის შემდეგ ვენესუელა ორ მილიონზე მეტმა მოქალაქემ დატოვა.
