ეროვნულ-დემოკრატიული ინსტიტუტის (NDI) ახალი კვლევის პოლიტიკური ნაწილი გამოქვეყნდა, რომლის მიხედვითაც, შემცირდა მათი რიცხვი, ვინც მთავრობის საქმიანობას დადებითად აფასებს.
კერძოდ, მოსახლეობის 56% მთავრობის საქმიანობას უარყოფითად აფასებს, მაშინ, როდესაც 2018 წლის დეკემბერში ეს რიცხვი 53% იყო, 2018 წლის მარტში კი - 49%.
მთავრობის საქმიანობას დადებითად მოსახლეობის მხოლოდ 36% აფასებს.
ამასთან, კვლევის მიხედვით, 46% თვლის, რომ ქვეყანა არასწორად ვითარდება.
26% მიიჩნევს, რომ საქართველო საერთოდ არ იცვლება, ხოლო 25%-ის აზრით, ქვეყანა სწორად ვითარდება. 4%-მა არ იცის.
ეროვნულ-დემოკრატიულმა ინსტიტუტმა NDI კვლევა წარმომადგენლობითი შერჩევის წესით, მთელი საქართველოს მასშტაბით ჩაატარა, გარდა ოკუპირებული ტერიტორიებისა.
საველე სამუშაოები 28 მარტიდან 15 აპრილამდე პერიოდში ჩატარდა ჩატარდა. სულ გამოიკითხა 2 927 ადამიანი. ცდომილების საშუალო ზღვარი +/- 2.3%-ია (თუმცა, რიგ კითხვებზე, შესაძლოა, ეს მაჩვენებელი შეიცვალოს).
