TBC ბანკის საქმე

ხაზარაძე-ჯაფარიძის ადვოკატის თქმით, ბრიტანეთში დასრულდა გახარიას წერილის ექსპერტიზა

0 კომენტარი

მამუკა ხაზარაძისა და ბადრი ჯაფარიძის ბრიტანელმა ადვოკატმა, სტივენ ქეიმ განაცხადა, რომ გაერთიანებულ სამეფოში სამეფოში დასრულდა იმ წერილის ექსპერტიზა, რომელიც მამუკა ხაზარაძის თქმით, გიორგი გახარიასგან მიიღო 2018 წლის საპრეზიდენტო არჩევნების მეორე ტურამდე.

"სისხლის სამართლის საქმის მიმდინარეობამ გამოიწვია, რომ წერილი გაერთიანებულ სამეფოში, სამცნიერო ლაბორატორიაში გაგზავნილიყო. მას იყენებენ სამართალდამცავები გაერთიანებულ სამეფოშიც. ამ ანალიზის შედეგები მეც მომაწოდეს. მას ასევე ამოწმებენ ლინგვისტურ ნიშან-თვისებებსა და მტკიცებულებებზე, საჯარო განცხადებაში მსგავსი ენის გამოყენებაზე იმ ადამიანების მიერ, ვინც ჩართულია ამ საქმეში. ამგვარად, მე ამ წერილს გამოვიყენებ საქმის განვითარების მომავალ ეტაპზე," - თქვა ხაზარაძისა და ჯაფარიძის ბრიტანელმა ადვოკატმა.

TBC ბანკის დამფუძნებლების ადვოკატებმა დღეს განაცხადეს, რომ აპირებენ, საქმე სტრასბურგის ადამიანის უფლებათა სასამართლოში განაგრძონ. ადვოკატმა ზვიად კორძაძემ წარადგინა სტივენ ქეი და ვენსან ბერგერი, ვინც საქართველოს ფარგლებს გარეთ დაიცავენ ხაზარაძისა და ჯაფარიძის ინტერესებს.

________________________________________________________________________________

TBC ბანკის წინააღმდეგ 2008 წლის ტრანზაქციების საქმის შესწავლა პროკურატურამ 2019 წლის იანვარში დაიწყო.

2019 წლის 14 თებერვალს საქართველოს ეროვნულმა ბანკმა TBC ბანკის დამფუძნებლების, მამუკა ხაზარაძისა და ბადრი ჯაფარიძის სამეთვალყურეო საბჭოდან გადადგომა მოითხოვა. განცხადებაში სებ-ი წერდა, რომ ამ გადაწყვეტილების მიღების საფუძველი ბანკის შემოწმებისას დაფიქსირებული ინტერესთა კონფლიქტია. ამასთან, ეროვნული ბანკის განცხადებაში აღნიშნული იყო, რომ საკითხის შესწავლისას გამოვლინდა "თიბისი ბანკის სამეთვალყურეო საბჭოს თავმჯდომარისა და მოადგილის მიერ ინტერესთა კონფლიქტი, რაც მარეგულირებელი საკანონმდებლო მოთხოვნების დარღვევაა".

21 თებერვალს მამუკა ხაზარაძემ და ბადრი ჯაფარიძემ TBC ბანკის სამეთვალყურეო საბჭოში თანამდებობები დატოვეს, თუმცა დარჩნენ TBC Bank Group LPC-ში. ამასთან, TBC ბანკმა განაცხადა, რომ ბანკი სასამართლო დავას წყვეტს საქართველოს ეროვნულ ბანკთან და გადაიხდის დაკისრებულ ჯარიმას 1 მლნ ლარის ოდენობით.

4 მარტს მამუკა ხაზარაძეს პარლამენტში საბიუჯეტო-საფინანსო კომიტეტზე მოუსმინეს, სადაც მან თქვა, რომ სებ-ის პრეზიდენტი კობა გვენეტაძე მას აშანტაჟებდა, ხოლო შინაგან საქმეთა მინისტრმა გიორგი გახარიამ 2018 წლის საპრეზიდენტო არჩევნების წინ მუქარის წერილი გაუგზავნა.

"არჩევნების მეორე ტურის წინ მე ვიღებ წერილს, რომელშიც პირდაპირი მუქარით გვეუბნება [გიორგი გახარია], რომ ისინი ჩვენს რეპუტაციას დაანგრევენ ადგილზე და საერთაშორისო ასპარეზზე. ეს წერილი მე მაქვს. მე ძალიან გამიკვირდა, რომ ასეთი წერილი დაწერეს და სიტყვიერად არ გვითხრეს ეს ყველაფერი. იქ იყო მოთხოვნები, რომლებიც ჩვენ, რა თქმა უნდა, არ შევასრულეთ. ამის მერე თქვენ იცით მოვლენების განვითარება,"- თქვა მამუკა ხაზარაძემ კომიტეტის მოსმენაზე. 

9 ივლისს კი მამუკა ხაზარაძემ სოციალურ ქსელში გაავრცელა განცხადება, სადაც წერდა, რომ ის საზოგადოებრივი მოძრაობის დაფუძნებას აპირებს.

24 ივლისს, პროკურატურამ თიბისი ბანკის დამფუძნებლებს უკანონო შემოსავლების ლეგალიზაციის მუხლით ბრალი წარუდგინა. თითოეულს აღკვეთის ღონისძიების სახით 700 000-ლარიანი გირაო შეუფარდეს, ასევე აუკრძალეს გამოძიების თანხმობის გარეშე საზღვრის კვეთა.

 

ახალი ვიდეო მეტი ვიდეო

შსს: მაღალტემპერატურულ ღუმელში 55 მლნ ლარის ღირებულების ნარკოტიკი გავანადგურეთ (VIDEO)

კომენტარები