შალვა თადუმაძე

TI: თადუმაძის დიპლომის ნამდვილობა არ დასტურდება

0 კომენტარი
ფოტო: მთავარი პროკურატურა

საერთაშორისო გამჭვირვალობა - საქართველო კიდევ ერთხელ აქვეყნებს ინფორმაციას მოქმედი გენერალური პროკურორისა და უზენაესი სასამართლოს უვადო მოსამართლეობის კანდიდატის, შალვა თადუმაძის დიპლომის შესახებ.

ორგანიზაციის მიერ შეგროვებული დოკუმენტების ანალიზის თანახმად, არ დასტურდება თადუმაძის დიპლომის ნამდვილობა, რადგან მას არ მიუმართავს განათლების ხარისხის განვითარების ეროვნული ცენტრისათვის დიპლომის ნამდვილობის დასადასტურებლად.

გარდა ამისა, არ დასტურდება, არსებობდა თუ არა თბილისის ჰუმანიტარულ ინსტიტუტში იურიდიული ფაკულტეტი 1994-1998 წლებში, რომელიც, თადუმაძის მტკიცებით, მან დაამთავრა.

კანონმდებლობის თანახმად, მოსამართლეს უნდა ჰქონდეს არანაკლებ მაგისტრის ხარისხი. თადუმაძის შემთხვევაში არც ის დასტურდება, რომ ის ხარისხი, რომელიც მისი მტკიცებით, მიღებული აქვს, მაგისტრის ხარისხს უთანაბრდება.

ამასთან, თადუმაძეს ბიოგრაფიაში მითითებული აქვს, რომ უმაღლესი სასწავლებელი 1999 წელს დაამთავრა, მაშინ, როცა დიპლომში დამთავრების თარიღად 1998 წელია მითითებული. მოგვიანებით მან განმარტა, რომ სასწავლებელი ექსტერნად დაამთავრა. გამჭვირვალობაში ამბობენ, რომ არც ეს ფაქტი დასტურდება.

შალვა თადუმაძე 2011-2012 წლებში ბიძინა ივანიშვილის პირადი ადვოკატი იყო, ქართული ოცნების ხელისუფლებაში მოსვლის შემდეგ კი მთავრობის საპარლამენტო მდივანი და მთავრობის ადმინისტრაციის ხელმძღვანელი იყო. 2018 წლიდან ის იკავებს გენერალური პროკურორის თანამდებობას და ამჟამად წარდგენილია უზენაესი სასამართლოს უვადო მოსამართლეობის კანდიდატად. პარლამენტის იურიდიულმა კომიტეტმა მის კანდიდატურას მხარი უკვე დაუჭირა რვა ხმით ერთის წინააღმდეგ.

ახალი ვიდეო მეტი ვიდეო

შსს: ქუთაისში მარკეტი დააყაჩაღეს, დაკავებულია 1 პირი

კომენტარები