ნავთობის ბაზარი

$26,6 — ნავთობის ფასი ბოლო 17 წლის მინუმამდე დაეცა

0 კომენტარი
ფოტო: Reuters

2003 წლის სექტემბრის შემდეგ პირველად, Brent-ის მარკის ბარელი ნავთობის ფასი 27 დოლარს ჩამოცდა. ლონდონის სასაქონლო ბირჟაზე ნავთობის ფიუჩერსების ფასის მინიმალური მაჩვენებელი 26,6 დოლარს შეადგენდა.

ამ დროისთვის ფასი 26,9 დოლარია. კიდევ უფრო გაიაფდა WTI-ის მარკის ნავთობის ფასი და  25 დოლარს ჩამოცდა. ამგვარად, ნავთობის საერთაშორისო ფასები ბოლო 17 წლის მინუმამდე დაეცა. 

მიმდინარე წლის განმავლობაში ბარელი ნავთობის მაქსიმალური ფასი - იანვარში 71 დოლარს აღემატებოდა, თუმცა ახალი კორონავირუსის გავრცელების პარალელურად პროდუქციაზე მოთხოვნა მთელ მსოფლიოში მნიშვნელოვნად შემცირდა.

ფასები კიდევ უფრო დავარდა მას შემდეგ, რაც 6 მარტს ვენაში ნავთობის ექსპორტიორ სახელმწიფოთა [OPEC] სხდომაზე მოპოვების შემცირების ახალ ეტაპზე თანხმობა ვერ შედგა. როგორც ცნობილია, საუდის არაბეთის წინადადებისა და შესაბამისად ნავთობის მოპოვების კიდევ უფრო შემცირებას წინააღმდეგ რუსეთი წავიდა.

ამის პარალელურად, ვერ შედგა თანხმობა ძველი შეზღუდვების გაგრძელებაზეც, რომელიც საუდის არაბეთსა და რუსეთს შორის 2016 წელს გაფორმდა. სწორედ ამ შეთანხმებით კონტროლდებოდა ნავთობის ფასები ბოლო ოთხი წლის განმავლობაში. შეთანხმების ჩაშლის ფონზე ნავთობის ფასები ერთ დღეში 30%-ით დავარდა. 

ამის პარალელურად ცნობილია, რომ საუდის არაბეთი ნავთობის მოპოვებას ისტორიულ მაქსიმუმამდე - დღეში 12,7 მილიონ ბარელამდე აიყვანს. 300 ათასი ბარელით აპირებს მოპოვების ტემპების გაზრდას რუსეთიც. 

ძველი შეთანხმების მოქმედების ვადა პირველ აპრილს იწურება და სწორედ ამ დღიდან დაიწყება ნავთობის ფორსირებული მოპოვებაც, რაც დიდი ალბათობით კიდევ უფრო დააგდებს პროდუქციის ფასს. 

სხვადასხვა ანალიტიკური გამოცემის პროგნოზით უახლოეს კვირებში ნავთობის ფასი შესაძლოა ბარელზე 25 დოლარსაც ჩამოცდეს.

ახალი ვიდეო მეტი ვიდეო

"იარაღის მუქარით ტელეფონები და ფული წაართვა" - სენაკში ყაჩაღობისთვის 63 წლის კაცი დააკავეს

კომენტარები