ჩვილის ყიდვა-გაყიდვის ფაქტზე სახელმწიფო უსაფრთხოების სამსახურის ანტიკორუფციული სააგენტოს თანამშრომლებმა დუშეთში სამი ადამიანი დააკავეს, მათ შორის, ახალშობილის მშობლები.
სუს-ის ცნობით, დუშეთში მცხოვრებ წყვილს ბავშვი 18 ივნისს შეეძინათ. გამოძიების მიხედვით, "დიდი ოდენობით შემოსავლის მიღების მიზნით" წყვილმა ჩვილის გაყიდვა გადაწყვიტა.
მშობლები დაუკავშირდნენ კაცს, რომელსაც შეუთანხმდნენ, რომ ჩვილს $5 000-ის სანაცვლოდ მიჰყიდნენ. შეთანხმების შემდეგ ადამიანი, რომელსაც ჩვილის ყიდვა უნდოდა, სამოქალაქო რეესტრში ბავშვის მამად დარეგისტრირდა და დაბადების მოწმობაც აიღო.
უწყების ინფორმაციით, ამის შემდეგ მან $5 000 ახალშობილის მშობლებს მისცა, რა დროსაც სამივე დააკავეს.
ტაბულას სუს-ში უთხრეს, რომ გამოძიება სისხლის სამართლის კოდექსის 172-ე მუხლის პირველი და მეორე ნაწილებით მიმდინარეობს, რაც არასრულწლოვნის მიმართ უკანონო გარიგებას გულისხმობს. დანაშაული ითვალისწინებს 2-დან 5 წლამდე თავისუფლების აღკვეთას.
