თენგიზ ცერცვაძე

ცერცვაძე სერგეენკოს: რატომ მიიყვანეთ განადგურების პირას ინფექციური საავადმყოფო

0 კომენტარი

ინფექციური პათოლოგიის, შიდსისა და კლინიკური იმუნოლოგიის ცენტრის გენერალური დირექტორი, თენგიზ ცერცვაძე, ჯანდაცვის ყოფილ მინისტრსა და ქართული ოცნების მაჟორიტარობის კანდიდატს, დავით სერგეენკოს, წერილით მიმართავს.

თენგიზ ცერცვაძე ინფექციური საავადმყოფოს Facebook გვერდის საშუალებით დავით სერგეენკოს განცხადებას ეხმაურება, რომ მინისტრს მარტო არაფრის გაკეთება არ შეუძლია, გაფუჭება კი – ბევრის. და სთხოვს, დააკონკრეტოს რა გაუფუჭა და რა გაუკეთა მან საყოველთაო ჯანდაცვის პროგრამას. 

"ა.წ. 21და 26 ივლისს ტელეკომპანია "იმედის" გადაცემებში, "არენა" და "იმედის კვირა" ჯანდაცვის ყოფილი მინისტრი ბატონი დავით სერგეენკო და გადაცემის სხვა მონაწილეები საუბრობდნენ ბ-ნი დავითის უდიდეს დამსახურებაზე საყოველთაო ჯანდაცვისა და C ჰეპატიტის ელიმინაციის სახელმწიფო პროგრამების ინიცირებასა და განხორციელებაში, "მის მიერ გადარჩენილ ათეულ ათასობით სიცოცხლეზე". ბ-ნმა დავითმა ლამის COVID-19-იც მიიწერა. ამავე დროს ბ-ნმა დავითმა თქვა ძალიან ნიშანდობლივი ფრაზა, რომ ჯანდაცვაში მინისტრს "მარტო არაფრის გაკეთება არ შეუძლია", ხოლო "გაფუჭება კი ბევრი რამის შეუძლია".

მინდა დაბეჯითებით ვთხოვო ბ-ნ დავითს, დააკონკრეტოს "რა გაუკეთა" და "რა გაუფუჭა" (რასაც ქვეყანა ახლა იმკის) მან საყოველთაო ჯანდაცვის პროგრამას, კონკრეტულად, რა დამსახურება აქვს მას C ჰეპატიტის ელიმინაციის სახელმწიფო პროგრამის ინიცირებასა და განხორციელებაში და "რა გაუფუჭა" (რასაც ასევე ახლა ვიმკით) მან ამ პროგრამას. აგრეთვე, ვთხოვ გვიპასუხოს, რატომ მიიყვანა სრულიად გამიზნულად ქვეყნის ერთ-ერთი ყველაზე მნიშვნელოვანი სამედიცინო დაწესებულება - ინფექციური პათოლოგიის, შიდსის და კლინიკური იმუნოლოგიის სამეცნიერო-პრაქტიკული ცენტრი განადგურების პირას და როგორია მისი წვლილი იმაში, რომ ცენტრს, მის პერსონალს და პაციენტებს დღესაც უკიდურესად მძიმე პირობებში უწევთ ყოფნა და რატომ გადაწყვიტა მან ისტორიაში შესვლა "ეროსტრატეს" სახელით.

ბ-ნი დავითის პასუხზე იქნება დამოკიდებული ჩვენი შემდგომი ნაბიჯები." – წერია წერილში.

დავით სერგეენკო 2012 წლიდან 2019 წლამდე ჯანდაცვის მინისტრის თანამდებობას იკავებდა. მისი მინისტრობის დროს საქართველოში საყოველთაო ჯანდაცვა ამოქმედდა.

საყოველთაო ჯანდაცვის ამოქმედების პირველივე დღიდან, 2013 წლის პირველი ივლისიდან, პროგრამის ბიუჯეტი წლიდან წლამდე იზრდებოდა. ამასთანავე, უკლებლივ ყოველი წლის ბოლოს საჭირო იყო თანხის დამატება. როგორც წესი, პროგრამის ბიუჯეტი მესამე კვარტალში იწურებოდა.

ამჟამად, დავით სერგეენკო ქართული ოცნების მაჟორიტარობის კანდიდატია, რომლის სხვა კანდიდატებთან ერთად წარდგენას, თენგიზ ცერცვაძეც ესწრებოდა.

ახალი ვიდეო მეტი ვიდეო

შსს: ხუთმა პირმა ადამიანი შურისძიების მიზნით გაიტაცა და სცემა, ბრალდებულები დავაკავეთ

კომენტარები