შსს

თბილისში EU-ს წარმომადგენლობის ერთ-ერთი ოფისის გვერდით მცხოვრებლებმა ხელყუმბარა იპოვეს

0 კომენტარი
ფოტო: Pixabay

თბილისში, მოსე თოიძის ქუჩაზე ადგილობრივმა მცხოვრებლებმა ასაფეთქებელი ნივთიერება იპოვეს. ინფორმაცია ტაბულას შინაგან საქმეთა სამინისტროში დაუდასტურეს. 

როგორც ტელეკომპანია რუსთავი 2 იუწყება, იტალიურ ეზოში მცხოვრებ ადამიანებს თავდაპირველად ყურადღება არ მიუქცევიათ ნივთისთვის, რომელიც ერთ-ერთი სახლის სახურავზე პოლიეთილენის პარკში იყო გახვეული, თუმცა, მას შემდეგ, რაც ის ჩამოვარდა და ძირს დაეცა, მცხოვრებლებმა ივარაუდეს, რომ ეს ხელყუმბარაა და კრიმინალურ პოლიციას დაუკავშირდნენ.

შენობა იტალიური ევროკავშირის წარმომადგენლობის ერთ-ერთი ოფისის  გვერდით დგას. შენობაზე დამონტაჟებულია სათვალთვალო ვიდეოკამერები და, სავარაუდოდ, სამართალდამცველები უპირველეს ყოვლისა ამ მტკიცებულებებს შეამოწმებენ. 

ადგილზე უკვე მუშაობენ განმნაღმველები. სამართალდამცველებმა იქ მცხოვრებლებს ეზო დაატოვებინეს. როგორც ტაბულას შსს-ში უთხრეს, გამოძიება სისხლის სამართლის კოდექსის 236-ე მუხლით დაიწყო, რაც ცეცხლსასროლი იარაღის (გარდა სანადირო გლუვლულიანი ცეცხლსასროლი იარაღისა), საბრძოლო მასალის, ფეთქებადი ნივთიერების ან ასაფეთქებელი მოწყობილობის მართლსაწინააღმდეგო შეძენას, შენახვას, ტარებას, დამზადებას, გადაზიდვას, გადაგზავნას ან გასაღებას გულისხმობს.

ახალი ვიდეო მეტი ვიდეო

ყოფილი ცოლის ცემისთვის ბათუმში 29 წლის კაცი დააკავეს (ვიდეო)

კომენტარები