Hyundai

Hyundai მფრინავი ავტომობილების მასობრივ წარმოებას გეგმავს

0 კომენტარი

სამხრეთ კორეის ყველაზე მსხვილი ავტომწარმოებელი მფრინავი ავტომობილების წარმოებას გეგმავს. Hyundai მუშაობს მოდელზე, რომელიც ქალაქის ფარგლებში 5-6 მგზავრს გადაიყვანს და უფრო დიდ ვერსიაზე საქალაქთაშორისო ფრენებისთვის. კომპანია ბაზარზე შესვლას 2028 წლისთვის გეგმავს. 

Hyundai-მ მფრინავი ავტომობილის პროტოტიპი ლას-ვეგასის სამომხმარებლო ელექტრონიკის შოუზე წარადგინა. საჰაერო ავტომობილი, თავდაპირველად, ხელმისაწვდომი იქნება, როგორც Uber-ის საჰაერო ტაქსის სერვისის ნაწილი, ხოლო 2030 წლისთვის სრულიად ავტონომიური გახდება. 

"ადამიანები, რომლებიც მუდმივად გაჭედილები არიან საცობებში, გააცნობიერებენ რამდენად უფრო მოსახერხებელია საჰაერო ტრანსპორტით გადაადგილება და შედეგად ვნახავთ მოთხოვნის აფეთქებას". – განაცხადა კომპანიის საჰაერო მობილობის განყოფილების აღმასრულებელმა დირექტორმა, ჯაივონ შინმა, პროტოტიპის წარდგენისას. 

ავტომობილის საშუალო სიჩქარე 290 კმ/სთ იქნება და 300-600 მეტრის სიმაღლეზე იფრენს. ჰიუნდაი ამბობს, რომ გამოიყენებს უფრო პატარა, ელექტროენერგიაზე მომუშავე როტორებს, რათა ნაკლები ხმაური წარმოქმნას ვიდრე შიდა წვის ძრავზე მომუშავე ვერტმფრენმა.

მომდევნო წლების განმავლობაში ინდუსტრიამ პასუხი უნდა გასცეს კითხვებს იმის შესახებ, თუ როგორი პილოტის ლიცენზია იქნება საჭირო მფრინავი ავტომობილის სამართავად, რა ახალი წესები და ინფრასტრუქტურაა საჭირო იმის უზრუნველსაყოფად, რომ ტრანსპორტმა ხელი არ შეუშალოს თვითმფრინავებს და ვერტმფრენებს. შინის თქმით, მფრინავი ავტომობილების დებიუტი 2023 წელს შედგება, მაგრამ კომპანია მასობრივ წარმოებას 2028 წელს გეგმავს, როდესაც შეიქმნება სათანადო ინფრასტრუქტურა და ამაღლდება საზოგადოების ცნობიერება. 

ჰიუნდაი, ასევე, მუშაობს ტრანსპორტის ვარიანტზე, რომელიც დაახლოებით 300 კილოგრამის წონის საქონელს გადაზიდავს. კომპანიას არ აქვს გადაწყვეტილი, თუ სად ააშენებს პირველ საწარმოს.  

Hyundai- ს კონკურენტებს შორის არიან Airbus SE, Boeing Co. და სტარტაპები, როგორებიცაა Lilium. Vahana-მ, თვითმავალმა საჰაერო ტაქსიმ, რომელიც Airbus-ის სილიკონის ველის ინოვაციების ცენტრმა A3-მა განავითარა, პირველი სატესტო ფრენა 2018 წელს შეასრულა , ხოლო ბოინგის პროტოტიპმა გასული წლის იანვარში. ჩინურმა ელექტრული მანქანების მწარმოებელმა XPeng Inc თავისი პროტოტიპი გასულ თვეში წარმოადგინა. ის ორ ადამიანს ატარებს და 25 მეტრზე ლევიტირება შეუძლია.

Morgan Stanley-ს ანალიტიკოსების პროგნოზის თანახმად, საჰაერო ავტომობილების ტექნოლოგია 2040 წლისთვის $2.9 ტრილიონის ღირებულების ინდუსტრიას შექმნის. . 

ახალი ვიდეო მეტი ვიდეო

შსს: დედა-შვილი მოქალაქეებს დევნილის სტატუსს ჰპირდებოდა და ფულს ართმევდა

კომენტარები