აშშ-ს სახელმწიფო მდივანი მაიკ პომპეო საქართველოში იმყოფება. ვიზიტი სახელმწიფო მდივნის ტურნეს ფარგლებში იმართება.
საქართველოს მთავრობის ინფორმაციით, მაიკ პომპეო შეხვედრას გამართავს საქართველოს პრეზიდენტთან, სალომე ზურაბიშვილთან. შეხვედრა 18 ნოემბერს 09:30-ზე პრეზიდენტის სასახლეში გაიმართება.
ამის შემდეგ, 10:15-ზე აშშ-ს სახელმწიფო მდივანი საქართველოს მთავრობის ადმინისტრაციაში პრემიერმინისტ გიორგი გახარიას და საგარეო საქმეთა მინისტრ დავით ზალკანიანს შეხვდება.
11:15 საათზე დაგეგმილია ვიზიტი საპატრიარქოში. საგარეო საქმეთა სამინისტროს ინფორმაციით, პომპეო ილია მეორესთანაც გეგმავს შეხვედრას.
აშშ-ს სახელმწიფო დეპარტამენტის ცნობით, პომპეო საქართველოში ვიზიტისას სამოქალაქო სექტორს შეხვდება და მათ შეხედულებებს მოისმენს კანონის უზენაესობაზე, მოსამართლეთა და სასამართლო სისტემის დამოუკიდებლობაზე. შეხვედრა სასტუმრო შერატონში 12:05-ზე შედგება.
ამის პარალელურად ოპოზიცია გამართავს მდუმარე აქციას - "გაყალბებულია".
"აქცია გაიმართება 18 ნოემბერს, ოთხშაბათს, 11:00 საათზე ოპერიდან რესპუბლიკის მოედნის, ფილარმონიის, რუსთაველის მეტროსა და მელიქიშვილის მიმართულებით, დაცული 2-მეტრიანი დისტანციით. ყველა ადამიანს, ვინც მოვა მდუმარე აქციაზე, მიეცემა სტიკერი, რომელზეც ეწერება – გაყალბებულია.
ჩვენ ვფიქრობთ, რომ ჩვენი საზოგადოების უდიდესი ნაწილი შეიძლება ვერ თანხმდებოდეს ძალიან ბევრ რამეზე, პოლიტიკურ გემოვნებაზე, მემარჯვენეობაზე, მემარცხენეობაზე და ასე შემდეგ, მაგრამ უდიდესი ნაწილი ვთანხმდებით, რომ არჩევნები არის გაყალბებული". – თქვა ევროპული საქართველოს ლიდერმა, გიგი უგულავამ.
31 ოქტომბრის საპარლამენტო არჩევნების შედეგების გამოქვეყნებას ოპოზიცური პარტიებისა და ამომრჩევლების პროტესტი მოჰყვა. ისინი არჩევნების შედეგებს არალეგიტიმურად – გაყალბებულად მიიჩნევენ და პერმანენტულ საპროტესტო აქციებს მართავენ.
