საქართველოს სტუმარ-მასპინძლობის სექტორი ამ წუთებში მთავრობის კანცელარიასთან პრესკონფერენციას მართავს. რესტორნების, კაფე-ბარებისა და კვების დაწესებულებების წარმომადგენლები ინდუსტრიის გადასარჩენად შემუშავებულ გეგმაზე იმსჯელებენ და პრემიერმინისტრ გიორგი გახარიას 5 მოთხოვნით მიმართავენ.
საინიციატივო ჯგუფის მიერ შემუშავებული მოთხოვნებია:
- სახელმწიფოს მიერ შემდგომი ორთვიანი პერიოდის განმავლობაში ინდუსტრიაში დასაქმებულთა ხელფასის კომპენსაცია 50%-ით.
- სახელმწიფო გახდეს გარანტი საქართველოში მომუშავე ფინანსურ ინსტიტუტებთან, როგორც სფეროში მომუშავე იურიდიული, ისე ფიზიკური პირებისთვის სესხების გაცემის უზრუნველსაყოფად და ასევე კვების ობიექტებისთვის გრძელვადიანი დაბალპროცენტიანი, ხოლო ლოკდაუნის ორთვიან პერიოდში - ნულპროცენტიანი სესხების გამოსაყოფად, რაც მიემართება თანამშრომლების ხელფასების ასანაზღაურებლად.
- სტუმარ-მასპინძლობის ინდუსტრიისთვის, ერთი წლის განმავლობაში, შემსუბუქდეს დღგ-ს განაკვეთი.
- დაწესდეს საშეღავათო პერიოდი სტუმარ-მასპინძლობის სფეროში მომუშავე იურიდიული პირებისთვის ყველა სახის კომუნალურ გადასახადზე.
- ინდუსტრიას კვლავ მიეცეს საშუალება, ისარგებლოს საშემოსავლო გადასახადის სუბსიდირების პროგრამით, ერთი წლის განმავლობაში.
"წინააღმდეგ შემთხვევაში, სპეციალისტების პროგნოზით, მუშაობას ვეღარ გააგრძელებს საქართველოში არსებული კვების ობიექტების 80%, რაც გრძელვადიან პერსპექტივაში არასახარბიელო მდგომარეობას შექმნის ქვეყანაში ტურიზმის განვითარების კუთხით". - წერს საინიციატივო ჯგუფი.
