კომპიუტერი

Apple-მა ახალი თაობის MacBook Pro წარადგინა

0 კომენტარი

სან-ფრანცისკოში 11-15 ივნისს Apple-ის დეველოპერთა მსოფლიო კონფერენცია (WWDC 2012) ჩატარდა. აქ წარმოდგენილი მრავალი სიახლიდან უდავოდ გამორჩეული იყო შუშის ყუთში გამოფენილი ახალი თაობის MacBook Pro. კონფერენციის დაწყებამდე ინტერნეტში, როგორც ეს Apple-ის ყველა ღონისძიების წინ ხდება, ვრცელდებოდა მრავალგვარი ინფორმაცია, მათ შორის ისიც, რომ მოსალოდნელია ახალი MacBook-ის გამოსვლა. ამის საფუძველს იძლეოდა ის ფაქტი, რომ უკანასკნელი ორი წლის განმავლობაში მისი განახლება არ გვინახავს. თუმცა ვარაუდობდნენ, რომ ის MacBook Air-ის მსგავსი იქნებოდა.

სინამდვილეში კი ახალი თაობის MacBook Pro არც 15-დუიმიანი MacBook Air გახლავთ და არც ტრადიციული Pro. ის ამ ორ არსებულ მოწყობილობას შორის სადღაც შუაში დგას. ერთ-ერთი მთავარი ღირსება, რაც Apple-ის ახალ ნოუთბუქს აქვს, არის Retina-ეკრანი. მსგავსი ეკრანი აქვს Apple-ისვე iPhone 4S-ს. თავის დროზე ეს რევოლუციურ გამოგონებად შეაფასეს – თვით Apple-ის საიტზეც კი, iPhone 4S-ის ერთ-ერთ მთავარ განსხვავებად წინა მოდელისგან ამ ტექნოლოგიის ეკრანია დასახელებული.

ახალი MacBook Pro ძალიან თხელია, მისი სისქე მხოლოდ 1.8 სანტიმეტრს შეადგენს, ანუ 25%-ით ნაკლებს, წინა ვერსიასთან შედარებით. ეს ზუსტად იმდენია, რაც 13-დუიმიანი მონიტორის მქონე MacBook Air-ის სისქე. თუმცა, ამასთანავე, იგი 15-დუიმიანი მონიტორითაა აღჭურვილი. ვისაც ამ ორივე მოწყობილობის რეალურად გატესტვა და შედარების საშუალება უკვე მიეცა, აღნიშნავენ, რომ შეგრძნებები მაინც განსხვავებულია. თუმცა, თუკი Air-თან შედარებით ახალი ნოუთბუქი ოდნავ მოუქნელი ჩანს, თავის პირდაპირ წინაპარ Pro-ს აშკარად სჯობს კომპაქტურობით.

მოდი, ვნახოთ რა დევს ამ ახალ, ლამაზ კორპუსში. ეკრანის აღწერას რომ მოვრჩეთ, საკმარისია იმის აღნიშვნაც, რომ მისი გაფართოება სარეკორდო: 2880 – 1800 პიქსელზეა. ეს ნიშნავს, რომ ერთ დუიმზე 220 პიქსელი მოდის. Apple-ის წარმომადგენლის, ფილ შილერის თქმით, ნოუთბუქებისთვის ეს დღესდღეობით ყველაზე დიდი გაფართოებაა. ასეთი ხარისხის გამოსახულების უზრუნველსაყოფად ლეპტოპი აღჭურვილია Nvidia-ს 384-ბირთვიანი ვიდეობარათით GT 650 M. წარმადობით იგი 2011 წლის ტოპმოდელებს, 460 M-სა და 560 M-ს უახლოვდება. MacBook Pro-ს მთავარი პროცესორია ინტელის i7, ოთხბირთვიანი ძლიერი ჩიპი 2.7 გიგაჰერცი სიხშირით. 16 გიგაბაიტი ოპერატიული მეხსიერება კი აუცილებლად გაახარებს იმ მომხმარებლებს, რომლებსაც კომპიუტერის ბოლომდე დატვირთვა უყვართ.

რაც შეეხება გარე კონექტორებს – წინა მოდელებისგან განსხვავებით, მას მხოლოდ USB 3.0 პორტები აქვს, კორპუსის თითო მხარეს – თითო. გარე მონიტორის ან HD ტელევიზორის შესაერთებლად გამოიყენება HDMI პორტი. კორპუსზე ასევე აღმოაჩენთ ახალ, MagSafe 2 პორტსაც. საქმე ისაა, რომ ძველი MacBook-ის მფლობელებს მოუწევთ კვების ახალი ადაპტერების შეძენა, რომელიც მხოლოდ ამ პორტზე მუშაობს.

მოკლედ რომ შევაჯამოთ, Apple-ის მოყვარულთათვის, რომლებსაც ძლიერი, ლამაზი და მოსახერხებელი ლეპტოპი ესაჭიროებათ, ეს მშვენიერი საჩუქარია. თუმცა მათ ამ „სათამაშოსთვის” 2199 დოლარის გადადებაც მოუწევთ.

ახალი ვიდეო მეტი ვიდეო

ბინის გაქურდვის დროს, თბილისში ერთი კაცი დააკავეს (ვიდეო)

კომენტარები