საქართველოს პრემიერმინისტრი ბიძინა ივანიშვილი, კობა დავითაშვილის ბრალდებებს გამოეხმაურა, ჯანდაცვის მინისტრ დავით სერგეენკოსთან დაკავშირებით. როგორც სტრასბურგში მყოფმა ივანიშვილმა ქართველ ჟურნალისტებს განუცხადა, დავითაშვილს დღეს ტელეფონით ესაუბრა და "საკმაოდ ეჩხუბა".
პრემიერის თქმით, თუ დავითაშვილს კოალიციაში დარჩენა სურს, გუნდს ანგარიში უნდა გაუწიოს.
"ვესაუბრე კობა დავითაშვილს და საკმაოდ ვეჩხუბე. მან უნდა მოახერხოს და ჯერ საკუთარ გუნდში უნდა გააკეთოს განმარტებები. იგი მუდამ ახერხებს გარედან ინფორმაციის შემოტანას და თანაც ისე, რომ ეს არაფერს ეფუძნება. ძალიან საწყენი იყო, რომ დავითაშვილმა ეს გააკეთა. მე მას ავუხსენი, რომ თუ მას სურს გუნდში დარჩენა, გუნდს ანგარიში უნდა გაუწიოს და ინფორმაცია პირველად გუნდში გააჟღეროს. ელემენტარული წესები არსებობს ყველაფერში. სერგეენკო უპატიოსნესი კაცია და ეს თემა არის ხელოვნურად მოგონილი. არავითარ კორუფციას არ აქვს ადგილი, ის აბსოლუტურად წესიერი კაცია", - აღნიშნა ბიძინა ივანიშვილმა.
შეგახსენებთ, კვირის ქრონიკისთვის მიცემულ ინტერვიუში კობა დავითაშვილმა ჯანდაცვის მინისტრს ბრალი დასდო კორუფციაში - კერძოდ, სადაზღვევო კომპანიების ლობირებასა და ჯანდაცვის რეფორმის არარსებობაში.
ჯანდაცვის მინისტრმა, დავით სერგეენკომ, დეპუტატ კობა დავითაშვილისგან ბრალდებების დამტკიცება ან საჯაროდ ბოდიშის მოხდა მოითხოვა.
"მე მძიმე დანაშაულში მდებს კობა დავითაშვილი ბრალს. ეს დანაშაული უმძიმესია, ვინაიდან, როგორც სახელმწიფო მოხელეს, კორუფციაში მდებს ბრალს, მან ეს ბრალდებები უნდა დაამტკიცოს ან საჯარო ბოდიში მოიხადოს", - აღნიშნა სერგეენკომ.
რის შემდეგაც, დავითაშვილმა განაცხადა, რომ სერგეენკოსთვის ბოდიშის მოხდას არ აპირებს.
"ბატონ დავით სერგეენკოს ვურჩევ, პასუხი გასცეს დასმულ შეკითხვებს. შეკითხვები არის ძალიან კონკრეტული, მისი გადაწყვეტილებები არის კერძო სადაზღვევო კომპანიების ინტერესებში. როგორც ჩანს, ბატონ სერგეენკოს სურს, არსებით განხილვას თავი აარიდოს და ფორმალობაზე გადაიტანოს საკითხი. ამიტომ მას მოუწევს პასუხების გაცემა, სანამ პასუხებს არ გასცემს, ბოდიშს კი არა, ვერაფერს ვერ მიიღებს ჩემგან. მისი პარლამენტში მოსვლის საკითხი დაყენებული მაქვს ფრაქციის წინაშე", - განაცხადა დავითაშვილმა.
