კიევის პროკურორის მოადგილე სერგეი სოფიევმა რამდენიმე საათის წინ გამართულ პრესკონფერენციაზე განაცხადა, რომ უკრაინელმა სამართალდამცავებმა დააკავეს 2 აქტივისტი, რომლებიც 1 დეკემბერს, პრეზიდენტის ადმინისტრაციაზე ბულდოზერით განხორციელებულ შტურმში მონაწილეობდნენ.
სოფიევს არ დაუკონკრეტებია, დაკავებულები რა ფორმით იყვნენ ჩართული ინციდენტში. ინფორმაციას ამის შესახებ სააგენტო იტარ ტასი ავრცელებს.
უკვე 1 კვირაზე მეტია უკრაინის მასშტაბით ევროინტეგრაციის, ასევე, მთავრობისა და პრეზიდენტის გადადგომის მოთხოვნით საპროტესტო აქციები იმართება. ყველაზე მასშტაბური აქცია 1 დეკემბერს პოლიციასთან შეტაკებით დასრულდა, რა დროსაც 20-მდე სამართალდამცავი და აქციის ასეულობით მონაწილე დაშავდა.
საპროტესტო აქციის მონაწილეებმა სწორედ ამ დღეს ბულდოზერით პრეზიდენტის რეზიდენციაზე შტურმი სცადეს, დაშავდა 1 პოლიციელი.
კიევის პროკურორის მოადგილის განცხადებით, სისხლის სამართლის გამოძიებაა დაწყებული უკრაინული ნაციონალისტური ორგანიზაცია Братство-ს ლიდერის, დმიტრი კორჩინსკის მიმართ. მასზე უკვე გამოცხადდა ძებნა. კორჩინსკის ბრალად მასობრივი არეულობების ორგანიზება ედება. არაოფიციალური ცნობით, მან უკვე დატოვა უკრაინის ტერიტორია.