საქსტატის მონაცემებით, 2014 წლის მესამე კვარტალში პირდაპირმა უცხოურმა ინვესტიციებმა (FDI) $508 მილიონი დოლარი შეადგინა, რაც გასული წლის ანალოგიურ მონაცემებს 99%-ით აღემატება. 2014 წლის მესამე კვარტალში ყველაზე მსხვილი $181 მილიონიანი პირდაპირი უცხოური ინვესტიცია მშენებლობის სფეროში განხორციელდა, რაც 2014 წლის მეორე კვარტალში მთლიანად ყველა სექტორში განხორციელებულ ინვესტიციას აღემატება.
საქსტატის მონაცემებით, 2014 წლის მეორე კვარტალში ამ მაჩვენებელმა $150 მილიონი შეადგინა, რაც 2013 წლის მონაცემთან შედარებით 27%-ით ნაკლებია. მეტიც, მეორე კვარტალში შემოსული ინვესტიციები გასული ათი წლის მინიმუმს წარმოადგენდა, მაშინ ექსპერტებმა საქართველოს საინვესტიციო გარემოს მიმზიდველობის შემცირებაზე დაიწყეს საუბარი.
მესამე კვარტალში ყველაზე დიდი $149-მილიონიანი ინვესტიცია ჩინეთიდან შემოვიდა, რაც უპირატესად სამშენებლო სექტორისკენ იყო მიმართული. საინტერესოა, რომ ჩინური ინვესტიცია წლის პირველ და მეორე კვარტალში მხოლოდ $8 მილიონს შეადგენდა. გასულ წელს ჩინური ინვესტიციის მოცულობამ $89 მილიონი შეადგინა.
საქსტატის მონაცემებით, უმსხვილეს ინვესტორებს შორის მოხვდნენ
- ჩინეთი (29%)
- აზერბაიჯანი (19%)
- ნიდერლანდები (18%)
- პანამა (9%)
- მალტა (7%)
- გაერთიანებული სამეფო (5%)
- აშშ (5%)
- თურქეთი (4%)
- და რუსეთი (3%)
ინვესტიციების ყველაზე დიდი ნაწილი მშენებლობაზე მოდის (36%). მეორე ადგილზე ტრასნპორტისა და კავშირგაბმულობის სექტორია (21%). უძრავი ქონება (12%), დამამუშავებელი მრეწველობა (9%) საფინანსო სექტორი (8%), ენერგეტიკაზე კი განხორციელებული ინვესტიციების 7% მოდის.
უცხოური ინვესტიციების რაოდენობის გაზრდა ქვეყნის ეროვნული ვალუტის სტაბილურობის ერთ-ერთი მნიშვნელოვანი განმაპირობებელი ფაქტორია.
საქსტატის მონაცემებით, 2014 წლის მანძილზე უკვე შემოსულია $924 მილიონის მოცულობის პირდაპირი ინვესტიცია, რაც გასული წლის პირველ სამ კვარტალში შემოსულ ინვესტიციებს $209 მილიონით აღემატება.
